Cuntegn da la pagina

Communicaziun da la Regenza dals 9 d'avrigl 2020

  • Erste Mitteilung
  • Neuen Beitrag einfügen
La Regenza vul garantir l'assistenza da persunas cun impediments tras las purschidas da l'integraziun da persunas cun impediments. Plinavant ha la Regenza approvà il project per renovar la punt sur l'Albigna en Bregaglia sco er la planisaziun dal "Trail center Tusaun".

Garantir l'assistenza da persunas cun impediments tras las purschidas da l'integraziun da persunas cun impediments

Per il chantun èsi impurtant che las furnituras ed ils furniturs da purschidas da l'integraziun da persunas cun impediments na vegnian betg en difficultads finanzialas tras la situaziun actuala e che l'assistenza da persunas cun impediments saja garantida er vinavant.
Las furnituras ed ils furniturs da las purschidas cuntinueschan cun lur manaschi resguardond las mesiras da protecziun da l'Uffizi federal da sanadad publica cunter il coronavirus. Las contribuziuns ordinarias dal chantun a las furnituras ed als furniturs da purschidas da l'integraziun da persunas cun impediments vegnan pajadas vinavant durant il temp da las mesiras per cumbatter il coronavirus. La limitaziun temporala dal pajament da las contribuziuns en cas d'absenzas pli lungas d'utilisadras e d'utilisaders en consequenza da las mesiras per cumbatter il coronavirus vegn abolida temporarmain. Per garantir l'assistenza da las persunas cun impediments pon vegnir furnids servetschs d'assistenza alternativs.
Sche las consequenzas finanzialas da las mesiras per cumbatter il coronavirus duessan periclitar il manaschi da las purschidas da l'integraziun da persunas cun impediments, examinescha il chantun ulteriuras mesiras.

Per il chantun èsi impurtant che las furnituras ed ils furniturs da purschidas da l'integraziun da persunas cun impediments na vegnian betg en difficultads finanzialas tras la situaziun actuala e che l'assistenza da persunas cun impediments saja garantida er vinavant.

Garanzia dals servetschs da las organisaziuns socialas

Il chantun procura che las organisaziuns socialas possian furnir lur servetschs. La populaziun duai vegnir sustegnida a maun da cussegliaziuns u d'accumpagnaments er durant il temp da las mesiras per cumbatter il coronavirus. En spezial la Chasa da dunnas dal Grischun e l'Uniun per l'agid da survivenza sustegnan umans en situaziuns d'urgenza.

Il chantun procura che las organisaziuns socialas possian furnir lur servetschs.

La punt sur l'Albigna en Bregaglia vegn remplazzada

La Regenza ha approvà il project per renovar la punt sur l'Albigna en Bregaglia. Sche vehichels cun in pais total da 40tonnas traversan occasiunalmain la punt, n'exista actualmain nagin privel acut ch'ella sballunia. Ma per il traffic da manaschi da 40tonnas n'è la segirezza structurala da la punt betg suffizienta. Perquai ch'ina reparaziun pretendess mesiras da rinforzament voluminusas ed exageradas vi da l'entira structura purtanta, vegn la punt sur l'Albigna remplazzada dal tuttafatg. La punt nova vegn construida al medem lieu sco la punt existenta. Pervia da quai èsi previs da construir in sviament provisoric per il temp da construcziun. Tut en tut custa il project circa 5milliuns francs.

-©Uffizi federal da topografia

La Regenza ha approvà il project per renovar la punt sur l'Albigna en Bregaglia.

La Regenza ha approvà la planisaziun dal "Trail center Tusaun"

Cun in pèr giavischs ha la Regenza approvà la revisiun parziala da la planisaziun locala che la vischnanca da Tusaun aveva concludì ils 31 da mars 2019. Tras la revisiun parziala vegnan stgaffidas las premissas da la planisaziun d'utilisaziun per realisar il "Trail center Tusaun", in areal d'exercizi per mountainbikes e per velos cun obstachels e cun elements da charrar. Il stabiliment incl. duas plazzas da parcar è planisà sin l'areal da guaud ch'è situà al nordost dal bogn avert da Tusaun. Là datti gia in percurs Vita ed ina pista finlandaisa. Il "Trail center Tusaun" è destinà a tut las gruppas da vegliadetgna e da nivel, tant a ciclistas e ciclists da muntogna versads sco er a principiantas e principiants.

-©Comet Photoshopping ScRL / Dieter Enz

Cun in pèr giavischs ha la Regenza approvà la revisiun parziala da la planisaziun locala che la vischnanca da Tusaun aveva concludì ils 31 da mars 2019.

Contribuziun chantunala per renovar la staziun da Grüsch

La Regenza ha concedì ina contribuziun chantunala da maximalmain 650 000 francs per renovar la staziun da Grüsch. La vischnanca da Grüsch e la Viafier retica han elavurà ina soluziun cuminaivla per la renovaziun Ils stabiliments existents da la Viafier retica e da la fermada da l'auto da posta èn antiquads e na satisfan betg pli a las pretensiuns da las viagiaturas e dals viagiaturs d'ozendi. En spezial ston er vegnir ademplidas las pretensiuns da la lescha federala concernent l'accessibilitad senza barrieras per persunas en sutga cun rodas e per persunas cun ina mobilitad restrenschida.

La Regenza ha concedì ina contribuziun chantunala da maximalmain 650 000 francs per renovar la staziun da Grüsch.

Contribuziun chantunala per il Forum economic dal Grischun

La Regenza ha concedì al Forum economic dal Grischun (WIFO GR) ina contribuziun chantunala da 120 000 francs per l'onn 2020. Il WIFO GR vesa sasez sco lavuratori classic da reflexiun. Sco tal sa concentrescha el en moda consequenta sin la lavur da basa. Mintga onn tscherna el in tema central che s'orientescha vi da las sfidas da l'economia publica dal Grischun. Las enconuschientschas vegnan lura messas a disposiziun a la publicitad sco er a circuls politics

La Regenza ha concedì al Forum economic dal Grischun (WIFO GR) ina contribuziun chantunala da 120 000 francs per l'onn 2020.

Neuer Artikel
Gremi: Regenza
Funtauna: rg Chanzlia chantunala dal Grischun