Cuntegn da la pagina

Crisa da corona: Visita da la Regenza en las vals dal sid – apparat da respiraziun mobil per il Puschlav

  • Erste Mitteilung
  • Neuen Beitrag einfügen

Ina delegaziun da la Regenza e dal Stab directiv chantunal ha visità oz gievgia il Puschlav e la Bregaglia. En scuntradas individualas cun represchentantas e represchentants dals fatgs da sanadad, da la politica, da l'economia e da la Protecziun civila han il president da la Regenza Christian Rathgeb ed il cusseglier guvernativ Marcus Caduff pudì sa far in maletg da la situaziun en il territori da cunfin cun l'Italia. Il Centro sanitario Val Poschiavo ha survegnì da la Protecziun civila il medem di in apparat da respiraziun mobil ch'era vegnì empustà da la Confederaziun.

Las vals grischunas dal sid èn pertutgadas pli fitg da la crisa da corona che las autras regiuns dal Grischun. Sco gia la visita dad ier en la regiun Moesa ha la scuntrada dad oz en il Puschlav ed en Bregaglia gì l'intent da barattar opiniuns e da tgirar contacts. Represchentantas e represchentants da la politica e da l'economia da las regiuns Bernina e Malögia èn sa scuntrads oz cun il president da la Regenza Christian Rathgeb, schef dal Departament da finanzas e vischnancas, cun il cusseglier guvernativ Marcus Caduff, schef dal Departament d'economia publica e fatgs socials, sco er cun Martin Bühler, schef dal Stab directiv chantunal. L'intent da questa scuntrada è stà quel da tractar la situaziun actuala en las differentas regiuns, ma er da sclerir dumondas giuridicas e da discutar problems pratics sco er da tschertgar soluziuns.

In tema central è stada la regulaziun per las cunfinarias ed ils cunfinaris. La Regenza è conscienta da l'impurtanza da las forzas da lavur talianas per las vals dal sid. A medem temp èsi vegnì appellà a las interpresas d'observar rigurusamain las mesiras d'igiena da la Confederaziun. Quai na valia betg mo a la plazza da lavur, mabain er per ils viadis da las cunfinarias e dals cunfinaris nà da chasa e puspè enavos.

La Regenza ha verifitgà al lieu che questas mesiras vegnan er observadas e controlladas strictamain. En il rom da la scuntrada ha la Protecziun civila transportà la mesemna in apparat da respiraziun mobil en il Centro sanitario Val Poschiavo. Grazia a quest apparat po il Centro sanitario Val Poschiavo porscher dapli segirezza a las pazientas ed als pazients en cas da transports d'urgenza.

La Regenza è conscienta da la situaziun difficila da la populaziun, da las patrunas e dals patruns sco er da las lavurantas e dals lavurants en las regiuns da cunfin dal Grischun cun l'Italia. Il chantun vegn a far tut per las regiuns per dumagnar la situaziun, ed el è avert per il dialog.

Fotografias:

-
Runda da discussiun a Bregaglia
-

Runda da discussiun en la Casa Torre a Puschlav

-

Surdada da l'apparat da respiraziun tar il Centro sanitario Val Poschiavo

-


Infurmaziuns: 
- president da la Regenza dr. Christian Rathgeb, schef dal Departament da finanzas e vischnancas, 
tel. +41 81 257 32 01, e-mail Christian.Rathgeb@dfg.gr.ch
- cusseglier guvernativ Marcus Caduff, schef dal Departament d'economia publica e fatgs socials, 
tel. +41 81 257 23 01, e-mail Marcus.Caduff@dvs.gr.ch 
- Martin Bühler, schef dal Stab directiv chantunal, 
tel. +41 81 257 35 22, e-mail Martin.Bühler@amz.gr.ch


Gremi: Regenza
Funtauna: rg Stab directiv chantunal / CoronaComm

Neuer Artikel