Il cusseglier federal Alain Berset ed il president da la Regenza Christian Rathgeb han visità oz suentermezdi il producent da tecnica medicinala Hamilton Medical SA a Domat, projects da buna vischinanza a Panaduz/Razén sco er la "Helpline Grischun" a Cazas. Suenter han il cusseglier federal ed ina delegaziun da la Regenza discutà davart la strategia da realisaziun da la Confederaziun per schluccar pass per pass las mesiras da protecziun cunter il coronavirus.

Il cusseglier federal Alain Berset ha visità ensemen cun il president da la Regenza Christian Rathgeb il producent da tecnica medicinala Hamilton Medical SA a Domat. Els han survegnì tranter auter ina invista da la producziun d'apparats da respiraziun e da roboters da labor che vegnan exportads en tut il mund e che prestan ina contribuziun impurtanta per il provediment da la sanadad durant la crisa da corona.

Suenter han il cusseglier federal ed il president da la Regenza pudì sa far in maletg davart la lavur da la "Helpline Grischun" a Cazas. Qua sa tracti d'in post da consultaziun per telefon ch'è vegnì installà spezialmain per la situaziun actuala e che porscha in emprim agid psicologic en situaziuns d'urgenza. Els han discutà cun las collavuraturas ed ils collavuraturs da la helpline davart las sfidas e davart las experientschas en connex cun l'elavuraziun da las dumondas da las persunas che tschertgan agid.

Tranter las duas visitas èn il cusseglier federal ed il president da la Regenza s'inscuntrads cun commembras e commembers d'uniuns localas da Razén e da Panaduz, che han organisà ensemen projects en il sectur da l'agid da buna vischinanza en connex cun la crisa da corona. Els èn stads fitg impressiunads da l'engaschament e da la solidaritad da la populaziun en la convivenza locala.

Silsuenter ha gì lieu in barat cuminaivel tranter il cusseglier federal ed il president da la Regenza sco er ils cussegliers guvernativs Peter Peyer e Marcus Caduff. En quest rom èn vegnidas explitgadas las sfidas actualas per dumagnar la crisa da corona e discutadas las problematicas specificas per il chantun Grischun per schluccar las mesiras da la Confederaziun.

Fotografia agiuntada: 

Infurmaziuns: 
- president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch 
- cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch 
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch