Cuntegn da la pagina

Communicaziun da la Regenza dals 30 d'avrigl 2020

  • Erste Mitteilung
  • Neuen Beitrag einfügen
La Regenza ha prolungà il Program grischun cunter l'alcohol sco er il Program Promoziun da la sanadad e prevenziun en la vegliadetgna ed ha concedì contribuziuns chantunalas per il center da perscrutaziun CSEM a Landquart, per staziuns da mesiraziun e per servetschs da preavertiment en il Grischun sco er per l'access a Jenisberg en la vischnanca da Bravuogn Filisur.

Program grischun cunter l'alcohol e Program Promoziun da la sanadad e prevenziun en la vegliadetgna vegnan prolungads

La Regenza ha prolungà il Program grischun cunter l'alcohol (PGA) per ils onns 2021 fin 2024. Il PGA era vegnì evaluà l'onn 2019. Sin basa da la Strategia naziunala Dependenzas e sin basa dals resultats da l'evaluaziun dal PGA, vegnan – a partir da l'onn 2021 – l'Uffizi dal servetsch social chantunal e l'Uffizi da sanadad a sviluppar ina Strategia chantunala surordinada Dependenzas. A partir da l'onn 2025 duai questa strategia chantunala furmar la basa per la politica da dependenza dal chantun. Durant ils onns 2021 fin 2024 duain cuntinuar las activitads cumprovadas dal PGA. Ma il program survegn la nova denominaziun Program grischun Dependenzas (PGD) analogamain a Strategia naziunala Dependenzas. El cuntinuescha cun las activitads dal PGA ch'èn sa cumprovadas ed extenda quellas sin ulteriuras furmas da dependenzas.
Er il Program Promoziun da la sanadad e prevenziun en la vegliadetgna vegn prolungà per ils onns 2021 fin 2024. Durant ils proxims quatter onns duain star en il focus en emprima lingia persunas da 65 onns e dapli che abitan a chasa. La finamira è tranter auter quella da laschar abitar persunas attempadas uschè ditg sco pussaivel a chasa, da reducir il dumber da cupitgas e da retardar il basegn da tgira.

La Regenza ha prolungà il Program grischun cunter l'alcohol (PGA) per ils onns 2021 fin 2024.

Il center da perscrutaziun a Landquart vegn sustegnì er vinavant

La Regenza ha prolungà la cunvegna da prestaziun cun il Center svizzer d'electronica e da microtecnologia SA (CSEM SA) ed ha concedì ina contribuziun chantunala da 3,7 milliuns francs per ils onns 2020 e 2021.
Il center da perscrutaziun dal CSEM a Landquart gioga ina rolla impurtanta en il process d'innovaziun da las interpresas regiunalas da tecnologia. En contact direct cun las interpresas eruescha il center regularmain ils basegns regiunals specifics per las branschas e resumescha quests basegns en in portfolio da tecnologia. Il CSEM ha ina vasta attracziun ed augmenta pia la schanza che ulteriuras firmas d'auta tecnologia sa domicilieschian en la regiun. Ad interpresas pitschnas e mesaunas ed ad interpresas industrialas existentas porscha el plinavant access a know-how ed a las tecnologias las pli novas.

-

© CSEM SA

La Regenza ha prolungà la cunvegna da prestaziun cun il Center svizzer d'electronica e da microtecnologia SA (CSEM SA) ed ha concedì ina contribuziun chantunala da 3,7milliuns francs per ils onns 2020 e 2021.

La Regenza conceda contribuziuns per staziuns da mesiraziun e per sistems da preavertiment en il Grischun

Per mesirar las precipitaziuns, la temperatura ed il vent sco er per survegliar ils moviments da massa sco per exempel bovas, vegnan impundids en il Grischun tut en tut 2,9 milliuns francs durant ils onns 2020 fin 2024. La Regenza ha concedì ina contribuziun chantunala da 2,32 milliuns francs per quest intent.
Il sistem interchantunal da mesiraziun e d'infurmaziun IMIS vegn sviluppà dapi l'onn 1996 en collavuraziun cun la Confederaziun, cun ils chantuns, cun las vischnancas e cun ulteriuras gruppas d'interess. El cumpiglia staziuns da mesiraziun che vegnan coordinadas e survegliadas dal WSL Institut per la perscrutaziun da la naiv e da las lavinas a Tavau. Las datas servan sco basa per elavurar ils bulletins da lavinas naziunals e regiunals. Ultra da quai vegnan ellas duvradas per avertiments locals da lavinas.
Sistems da preavertiment vegnan duvrads per survegliar per exempel ils moviments da massa al Cuolm da Vi sur Sedrun ubain la crudada da crappa a Brinzauls. Per las persunas responsablas en las vischnancas èn els in agid indispensabel. Els permettan quellas d'avertir a temp la populaziun e d'ordinar las mesiras correspundentas sco evacuar u serrar vias

-

© Institut per la perscrutaziun da la naiv e da las lavinas WSL

Per mesirar las precipitaziuns, la temperatura ed il vent sco er per survegliar ils moviments da massa sco per exempel bovas, vegnan impundids en il Grischun tut en tut 2,9 milliuns francs durant ils onns 2020 fin 2024. La Regenza ha concedì ina contribuziun chantunala da 2,32 milliuns francs per quest intent.

Contribuziun chantunala per l'access a Jenisberg en la vischnanca da Bravuogn Filisur

La Regenza ha approvà il project cumplementar da la vischnanca da Bravuogn Filisur "Access a Jenisberg" cun cundiziuns ed ha concedì ina contribuziun chantunala dad 1,14 milliuns francs. Il vitg Jenisberg abità durant l'entir onn ed ils guauds circumdants sco er l'alp da Jenisberg han lur access sur la via davent da la staziun da Wiesen. Questa via è vegnida construida il cumenzament dal 20. tschientaner. Il project cuntegna la meglieraziun da l'access davent da la staziun da Wiesen, la sanaziun cumplessiva da la punt da crap ad artg sur la Landwasser, l'engrondiment supplementar da la via fin sur Jenisberg cun ulteriurs mirs da sustegn, la renovaziun da saivs, la fixaziun da las plattas da volver, il schlargiament ed il rinforz parzial dals vials, drenaschas supplementaras da la cuvrida da la via sco er stabilisaziuns da scarpas. Quai duai garantir la segirezza necessaria sin via e l'utilisabladad giavischada da l'access.

- -

La Regenza ha approvà il project cumplementar da la vischnanca da Bravuogn Filisur "Access a Jenisberg" cun cundiziuns ed ha concedì ina contribuziun chantunala dad 1,14 milliuns Francs.

Entrada en vigur da la Lescha davart l'Assicuranza d'edifizis

La revisiun parziala da la Lescha davart l'Assicuranza d'edifizis dal chantun Grischun, concludida dal Cussegl grond en la sessiun da december 2019 vegn messa en vigur retroactivamain per il 1. d'avrigl 2019. Tras la revisiun parziala vegnan assicurads er donns d'edifizis ch'èn d'attribuir ad ina influenza cuntinuanta. D'ina influenza cuntinuanta fa part la glischnada permanenta, da la quala èn pertutgads differents territoris en il chantun Grischun. Il motiv per la revisiun parziala è il fatg, che process glischnants (bovas e glischnadas permanentas) s'augmentan en il territori alpin e prealpin.

La revisiun parziala da la Lescha davart l'Assicuranza d'edifizis dal chantun Grischun, concludida dal Cussegl grond en la sessiun da december 2019 vegn messa en vigur retroactivamain per il 1. d'avrigl 2019.

Neuer Artikel

Gremi: Regenza
Funtauna: rg Chanzlia chantunala dal Grischun