Cuntegn da la pagina

Crisa da corona: Examens finals en gimnasis grischuns han lieu, scolas popularas e canortas d'uffants sa preparan per l'avertura

  • Erste Mitteilung
  • Neuen Beitrag einfügen

Sa basond sin il conclus dal Cussegl federal dals 29 d'avrigl 2020 ha la Regenza decidì da realisar quest onn mo examens da maturitad en scrit en ils gimnasis grischuns. Resguardond las mesiras da protecziun e las recumandaziuns da la Confederaziun sa preparan las scolas popularas en il chantun per cumenzar puspè cun l'instrucziun da preschientscha ils 11 da matg 2020.

En las scolas obligatoricas duai puspè avair lieu – sche pussaivel – l'instrucziun da preschientscha tenor l'urari regular a partir dals 11 da matg 2020. A chaschun da la reavertura da las scolas han las mesiras da protecziun e d'igiena l'emprima prioritad. Venderdi, il 1. da matg 2020, vegn il Departament d'educaziun, cultura e protecziun da l'ambient (DECA) ad infurmar las scolas davart las prescripziuns generalas sco er davart ils agids da planisaziun per realisar las mesiras da protecziun necessarias. Sin basa da las prescripziuns generalas dal DECA pon las scolas adattar lur manaschi da scola a las relaziuns localas (situaziun da spazi, transport da scolaras e scolars e.u.v.).

Las maturandas ed ils maturands dals gimnasis en il chantun ston cuntinuar a sa preparar per ils examens finals: Prendend mesiras da protecziun han lieu ils emprims examens en scrit a partir dals 11 da matg 2020.

Per las scolaras ed ils scolars dal gimnasi e dal gimnasi inferiur dura la situaziun extraordinaria anc fin ils 8 da zercladur 2020. Per els datti vinavant ina instrucziun a distanza. Las scolas medias privatas pon – sin dumonda – cumenzar cun l'instrucziun da preschientscha en il gimnasi inferiur a partir dals 11 da matg 2020.

A las scolas medias spezialisadas vegnan fatgs ils examens finals en scrit. Sch'i ston vegnir fatgs er ils examens finals a bucca, dependa d'in conclus anc pendent da la Conferenza svizra dals directurs chantunals da l'educaziun publica.

Pertutgant la maturitad professiunala ha il Cussegl federal concludì ch'i vegnia desistì dals examens chantunals da la maturitad professiunala federala en tut la Svizra. La maturitad professiunala federala obtegnan ins l'onn 2020 mo sin basa da las notas empiricas. Il chantun Grischun vegn a realisar questas prescripziuns.

Dapi il cumenzament da la crisa mez mars han dumagnà particularmain las persunas d'instrucziun, las scolaras ed ils scolars sco er ils geniturs grondas sfidas cun midar a l'instrucziun a distanza. La Regenza engrazia a tut las persunas participadas per lur engaschament enorm e las giavischa blera forza e perseveranza per il proxim temp.

Mesiras da protecziun en canortas d'uffants ed en gruppas da gieu
Las purschidas da la tgira d'uffants cumplementara a la famiglia pon puspè avrir lur manaschi resguardond las mesiras da protecziun a partir dals 11 da matg 2020. Las canortas d'uffants han gidà zunt fitg a dumagnar la crisa. Per tut las purschidas da tgira èn resultadas grondas sfidas organisatoricas e finanzialas. Per las canortas d'uffants stattan a disposiziun agids finanzials extraordinaris dal chantun e da las vischnancas. Las gruppas da gieu ch'èn stadas serradas durant las ultimas emnas, pon medemamain puspè avrir lur manaschi resguardond ils concepts da protecziun a partir dals 11 da matg 2020.

Pass da schluccada impurtants per la societad e per l'economia
Ils ulteriurs pass che la Confederaziun ha concludì per schluccar las mesiras a partir dals 11 da matg 2020, èn impurtants per normalisar la societad e l'economia. Sin basa da las schluccadas ha la Regenza er abolì l'obligaziun d'annunzia per possessuras e possessurs d'abitaziuns secundaras. Particularmain l'avertura da la gastronomia è in pass impurtant per turnar a la normalitad. Deplorà vegni che las telefericas n'han anc adina betg la segirezza da planisaziun per la proxima stagiun da stad.

Il dumber da cas diminuescha vinavant en il chantun. Tenor las prescripziuns da la Confederaziun ston persunas cun in test positiv dal coronavirus s'isolar, e tgi che ha gì contact cun ellas, sto sa metter en quarantina. A partir dals 11 da matg 2020 vegni cuntinuà er en il Grischun cun la repersequitabladad consequenta da persunas infectadas da nov.

Infurmaziuns:
- cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch
- cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch


Gremi: Chanzlia chantunala
Funtauna: rg Chanzlia chantunala

Neuer Artikel