Navigaziun principala

Cuntegn da la pagina

Problems d'alcohol èn tabu: il di d'acziun grischun rumpa il silenzi

  • Erste Mitteilung
  • Neuen Beitrag einfügen

Ils 14 da matg 2020 ha lieu il Di d'acziun grischun davart ils problems d'alcohol. La finamira da quest di è quella da far fin cun il tabu da la dependenza d'alcohol e da sensibilisar la publicitad per il tema. L'Uffizi da sanadad dal Grischun ha concepì per quest intent la pagina d'internet infurmativa www.bischfit.ch/alkohol.

Per las persunas ch'èn periclitadas da dependenza è la ristga da daventar dependentas d'alcohol actualmain pli gronda pervia da la crisa da corona. Las expertas ed ils experts da dependenza quintan cun in augment dals cas. Perquai èsi gist ussa impurtant da detabuisar ils aspects difficils dal consum d'alcohol e da sensibilisar la publicitad per quest tema.

A partir dals 14 da matg 2020 entran las instituziuns grischunas da la prevenziun e da la cussegliaziun da dependenza sco er da la terapia cunter la dependenza en contact sur differents chanals cun la populaziun dal Grischun. Expertas ed experts respundan per e-mail e per telefon dumondas persunalas. Ultra da quai vegn il tema explitgà or da differentas opticas sin TV e Radio Südostschweiz e discutà cun persunas spezialisadas. Tut ils contacts e tut las infurmaziuns davart il di d'acziun stattan a disposiziun sut www.bischfit.ch/alkohol. Las utilisadras ed ils utilisaders chattan là er tests persunals, mussavias per discurs, istorgias da persunas pertutgadas sco er ils posts da contact chantunals per dumandar agid professiunal.

Il di d'acziun grischun è ina part dal Di d'acziun naziunal davart ils problems d'alcohol che na po – pervia dal coronavirus – betg avair lieu sco usità. L'Uffizi da sanadad dal Grischun mantegna dentant il di previs, perquai che dependenzas èn – en spezial en situaziuns da crisa – da gronda relevanza.

Infurmaziuns:
Antonia Bundi, manadra dal Program grischun cunter l'alcohol, Uffizi da sanadad dal Grischun, Promoziun da la sanadad e prevenziun, tel. +41 81 257 64 07 u +41 79 202 37 58, e-mail antonia.bundi@san.gr.ch


Gremi: Uffizi da sanadad
Funtauna: rg Uffizi da sanadad

Neuer Artikel