Cuntegn da la pagina

Il chantun sustegna la stimulaziun da la dumonda turistica cun ina contribuziun speziala

  • Erste Mitteilung
  • Neuen Beitrag einfügen

Ina nova campagna turistica da communicaziun duai render attent las Svizras ed ils Svizzers a la purschida da vacanzas dal Grischun. Per quest intent vegni fatg diever da las iconas da reclama Gian e Giachen. La Regenza ha concedì a Grischun Vacanzas ina contribuziun speziala dad 1 milliun francs per realisar ina campagna da stad resp. d'atun.

En il Grischun ha la pandemia da corona tutgà il sectur da turissem cun tutta vehemenza. Per mitigiar las consequenzas economicas ha la Regenza prendì mesiras a favur dal turissem. Grischun Vacanzas ha elavurà in pachet da mesiras per stimular la dumonda turistica, cun l'intent d'obtegnair giasts svizzers la stad e l'atun 2020. La Regenza ha concedì a Grischun Vacanzas ina contribuziun speziala dad 1 milliun francs per sustegnair questa campagna da communicaziun. Resalvada resta l'approvaziun dal credit posteriur correspundent tras la Cumissiun da gestiun dal Cussegl grond.

Las mesiras da communicaziun han la finamira da motivar tant pli svelt ils giasts da vegnir en il Grischun. Ina campagna d'inspiraziun cun in ferm messadi è l'element central per quest intent. Plinavant duai vegnir purschida al giast ina plivalur che sa manifestescha tras aventuras e tras purschidas attractivas. Questas aventuras e purschidas duain tegnair quint da las circumstanzas particularas da questa stad resp. da quest atun.

Gian e Giachen èn da return
Il Grischun duai vegnir percepì sco destinaziun ideala e vischina. Per quest intent vegni fatg diever da Gian e Giachen, las iconas da reclama enconuschentas e bainvesidas, sco er da differentas mesiras da communicaziun accumpagnantas. Tenor la planisaziun da Grischun Vacanzas duai la campagna sa drizzar cunzunt a giasts svizzers che na vulan betg viagiar lunsch davent, mabain che tschertgan sapientivamain la vischinanza ed aventuras en la natira svizra. La campagna duai vegnir lantschada il cumenzament da zercladur. Ina segunda unda da communicaziun cun il focus sin l'atun è planisada per l'avust.

Per lantschar mesiras cuminaivlas en vista al proxim enviern è Grischun Vacanzas plinavant en stretg contact cun ils partenaris turistics.

Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel +41 81 257 23 01, e-mail Marcus.Caduff@dvs.gr.ch


Gremi: Departament d'economia publica e fatgs socials
Funtauna: rg Departament d'economia publica e fatgs socials

Neuer Artikel