La Regenza ha decidì da sa participar al program federal per sustegnair start-ups ch'èn crudads en ina situaziun finanziala d'urgenza pervia da las mesiras per cumbatter la pandemia da COVID-19. Start-ups cun bunas perspectivas che han stretgas da liquiditad pervia dal coronavirus vegnan sustegnids cun garanzias. Sco start-ups valan societads ch'èn vegnidas inscrittas en il register da commerzi suenter il 1. da schaner 2010, dentant avant il 1. da mars 2020. Sustegnidas vegnan exclusivamain societads ch'èn activas en ils secturs da la scienza e da la tecnologia.
65 pertschient da la garanzia vegnan finanziads da la Confederaziun e 35 pertschient dal chantun. Uschia garanteschan la Confederaziun ed il chantun cuminaivlamain 100 pertschient dals imports fin maximalmain 1 milliun francs per start-up. Ils credits ston vegnir restituids entaifer 10 onns, en cas da difficultads cun l'amortisaziun entaifer 15 onns. Il volumen total da las garanzias da la Confederaziun e dals chantuns a favur da start-ups en tut la Svizra na dastga betg surpassar 154 milliuns francs. Per il chantun Grischun ha la Regenza concludì da conceder garanzias a favur da start-ups da tut en tut maximalmain 3 milliuns francs. A partir d'immediat pon start-ups far ina dumonda per ina garanzia sin la pagina d'internet da la Confederaziun.

La Regenza ha abolì a partir d'immediat il scumond general da far visitas entaifer chasas da persunas attempadas e da tgira sco er entaifer instituziuns d'abitar per persunas creschidas cun impediments, premess che las instituziuns hajan in concept da protecziun suffizient ch'è implementà. La mesira sa basa sin il fatg ch'il dumber da cas da COVID-19 è sa reducì fermamain. En il rom da las schluccadas survegn la protecziun da persunas spezialmain periclitadas dentant bler dapli relevanza. Per tuttina pudair garantir la segirezza da las abitantas e dals abitants ston las chasas da persunas attempadas e da tgira sco er las instituziuns d'abitar per persunas creschidas cun impediments perquai avair in concept da protecziun cumplessiv che correspunda a las prescripziuns minimalas da l'Uffizi da sanadad.

En il rom da la nova politica regiunala da la Confederaziun (NPR) ha la Regenza concedì a la Viafier retica ina contribuziun da tut en tut 425 000 francs per il project "Grischun 360° – l'accumpagnament da viadi digital da la Viafier retica per il Grischun". Las contribuziuns NPR vegnan surpigliadas mintgamai per la mesadad da la Confederaziun e dal chantun.
Cun il project vul la Viafier retica prender en mira ina digitalisaziun cumplessiva da la purschida turistica en tut las destinaziuns dal chantun Grischun. Isa tracta d'in sistem unitar d'accumpagnament e da vendita per ils giasts, che surpiglia l'inspiraziun e la cudeschaziun en tut il chantun. Tut ils products turistics, sco entradas, events, bigliets da telefericas, restaurants, activitads e traffic public, vegnan purschids en moda concentrada e pon vegnir cudeschads directamain sur "Grischun 360°". Ils giasts duain vegnir sustegnids durant la planisaziun da lur vacanzas, durant lur arrivada e durant lur dimora. Dals furniturs da prestaziuns participants duain ils giasts survegnir purschidas ch'èn concepidas aposta per els.
Il project cumenza previsiblamain la stad 2020. L'enviern 2020/21 duai "Grischun 360°" esser terminà e star a disposiziun a tut las destinaziuns interessadas ed a tut ils furniturs da prestaziuns interessads en il chantun Grischun.

Illustraziun © Viafier retica

En il rom da la nova politica regiunala da la Confederaziun (NPR) vegn concedida a l'uniun World Heritage Experience Switzerland (WHES) ina contribuziun per il project "Plattafurma da cooperaziun per trair a niz las sinergias en ils conturns dal patrimoni mundial". La contribuziun NPR da tut en tut 560 000 francs vegn finanziada dals otg chantuns participads (Grischun, Berna, Glaruna, Neuchâtel, Son Gagl, Tessin, Vad e Vallais). A quests chantuns stattan a disposiziun meds finanzials NPR da la Confederaziun en la medema dimensiun.
En il rom dal project duai vegnir installada ina plattafurma, nua che tut ils acturs naziunals ed internaziunals en il patrimoni mundial da la UNESCO e tut las autoritads pon sa barattar e sa colliar. Uschia duai esser pussaivel da rimnar datas, da preparar, d'evaluar e da metter a disposiziun quellas als partenaris sco er da stgaffir novas purschidas cun cleras finamiras per ils giasts.
L'uniun WHES furma il tetg da la rait da las organisaziuns turisticas en ils territoris che han in patrimoni mundial. Ella vul concentrar las forzas sin plaun naziunal e gidar las organisaziuns turisticas ed ils patrimonis mundials a sviluppar in turissem dal patrimoni mundial surordinà, duraivel e coordinà.

La Regenza ha approvà il project "Protecziun cunter crudada da crappa Grep da Ferm" da la Viafier retica en la vischnanca da Sumvitg e concedì ina contribuziun chantunala da tut en tut var 3,6 milliuns francs.
En il territori da Grep da Ferm tranter Sumvitg e Mustér datti regularmain crudadas da crappa e da blocca che pericliteschan tant la via sursilvana sco er la lingia da viafier. Per proteger quellas duai il territori vegnir segirà cun montar raits cunter crudada da crappa d'ina lunghezza totala da 550 meters sco er cun stender raits sur ina surfatscha da tut en tut 3550 meters quadrat. Uschia pon vegnir reducidas considerablamain las ristgas da crudadas da crappa futuras.