Durant las ultimas emnas aveva il Stab directiv chantunal (SDC) surpiglià la direcziun en la crisa da corona. Perquai ch'il dumber da cas è sa reducì fermamain e la situaziun è sa schluccada, surdat la Regenza la direcziun ils 6 da zercladur 2020 puspè a l'Uffizi da sanadad. Quel vegn sustegnì d'in stab parzial dal SDC ch'è adattà a la pandemia e che stat sut la direcziun da l'Uffizi da militar e da protecziun civila. Il stab fa ultra da quai l'elavuraziun posteriura sco er preparativas per il cas d'ina eventuala segunda unda. La prontezza a l'acziun da la Protecziun civila per sustegnair il sectur da sanadad vegn garantida per entant fin la fin d'october 2020.
Infurmaziuns dattan a partir dals 8 da zercladur 2020 puspè ils departaments ed ils uffizis, perquai che la hotline telefonica dal post da communicaziun per corona vegn serrada. L'adressa dad
e-mail kfsinfo@amz.gr.ch vegn dentant mantegnida per dar scleriments.

La Regenza ha approvà il project "Bova a Brinzauls – registraziun da las basas da la bova Muntogna" da la vischnanca dad Alvra ed ha concedì ina contribuziun chantunala da var 4,05 milliuns francs.
Tras ina vasta registraziun da las basas è vegnida analisada ils ultims 3 onns la part sut da la bova, l'uschenumnada "bova Vitg". Durant ils ultims 2 onns è la bova s'accelerada fermamain. La bova ha cuntanschì ina sveltezza da fin 1,2 meters per onn en il vitg. D'in territori periclità considerablamain sa tracti, sch'ina bova ha ina sveltezza da passa 10 centimeters per onn. Entaifer la medema perioda è s'accelerada er la bova sur il vitg, l'uschenumnada "bova Muntogna". Ils spustaments han là sveltezzas da fin 6 meters per onn. Ina crudada da crappa na po betg vegnir exclusa.
La bova a Brinzauls è fitg cumplexa ed è actualmain ina da las sfidas las pli grondas en connex cun moviments da massa en il territori alpin. En il rom dal project duai vegnir analisada l'interacziun supponida tranter las duas parts da la bova per la chapir meglier. Il project cumpiglia ulteriurs sondagis sco er ulteriuras analisas geologicas e geofisicalas. Pervia dal privel da crudada da crappa e pervia da la sveltezza da la bova èsi impurtant che la registraziun da las basas ed en spezial ils sondagis necessaris vegnian fatgs gia la stad 2020.

La Regenza ha approvà il project per renovar la via taliana entaifer il vitg da Mesauc. La via taliana maina da Cuira Obertor sur il pass dal San Bernardin fin al cunfin dal chantun Tessin. Entaifer il vitg da Mesauc è la via chantunala nunsurvesaivla. Las pedunas ed ils peduns na vegnan betg protegids commensuradamain cunter il traffic motorisà.
En il rom dal project duai vegnir construida ina colliaziun nuninterrutta per las pedunas ed ils peduns, e las stretgas nunsurvesaivlas duain vegnir mitigiadas. Ultra da quai duai dar in surpassadi per pedunas e peduns cun ina insla centrala tant a l'entrada dal vitg sco er a la sortida dal vitg. Plinavant duain las fermadas da bus vegnir construidas sche pussaivel tenor ils basegns da las persunas cun impediments. La part chantunala dal project cuntegna en spezial la renovaziun dal corpus da la via e pitschnas correcturas da la via chantunala, sche la structura vischina dal vitg permetta quai.
En connex cun la renovaziun da la via taliana è vegnì elavurà er in project da sanaziun cunter la canera. Quel prevesa da mantegnair la salaschada dal vial en il sectur dals edifizis caracteristics per il lieu. Sin ils var 490 meters duai da nov valair tempo 30 e betg pli tempo 50 sco fin ussa.

Per renovar il provediment d'aua d'Alvaschagn da la vischnanca dad Alvra ha la Regenza concedì ina contribuziun da maximalmain 553 370 francs.
Ils stabiliments dal provediment d'aua d'Alvaschagn ston vegnir sanads. Il project prevesa da construir in nov reservuar cun ina reserva d'aua da diever da 100 meters cubic e cun ina reserva d'aua da stizzar fieu da 250 meters cubic sco er da renovar ils conducts principals sin ina lunghezza da circa 2,6 kilometers.