Navigaziun principala

Cuntegn da la pagina

Recumandaziuns per optimar l'agir da las autoritads: la Polizia chantunala, la APUC ed ils medis uffizials funcziuneschan e realiseschan las recumandaziuns d'agir

  • Erste Mitteilung
  • Neuen Beitrag einfügen

A chaschun dals eveniments en connex cun AQ èn vegnidas dadas differentas recumandaziuns d'agir en il rapport Brunner ed en il rapport da la CPI per optimar la lavur da las autoritads grischunas (guardar las communicaziuns a las medias dals 27 da november 2019 e dals 26 da november 2019). Ils singuls uffizis han gì l'incumbensa d'examinar las recumandaziuns d'agir e da realisar las optimaziuns, sche quellas èn raschunaivlas. Las autoritads èn sa fatschentadas intensivamain cun las recumandaziuns e han gia realisà quellas per gronda part.

l matg 2018 aveva la Regenza incumbensà dr. Andreas Brunner, anteriur emprim procuratur public directiv dal chantun Turitg, sco spezialist extrachantunal independent cun il scleriment administrativ dals eveniments en connex cun AQ l'onn 2017. Il november 2019 han tant dr. Andreas Brunner sco er la Cumissiun parlamentara d'inquisiziun (CPI) preschentà lur analisas. En tuts dus rapports vegnan mussadas recumandaziuns d'agir per optimar la lavur da las autoritads. Il Departament da giustia, segirezza e sanadad (DGSS) aveva incumbensà las persunas responsablas da la Polizia chantunala dal Grischun d'elavurar fin la primavaira 2020 in document d'analisa e da mesiras che tracta las recumandaziuns d'agir e las mesiras per optimar la lavur da la polizia. Quest rapport è vegnì elavurà ed inoltrà entaifer il termin fixà. Ultra da quai èn l'Autoritad per la protecziun d'uffants e da creschids (APUC) e l'Uffizi da sanadad vegnids incumbensads d'examinar las recumandaziuns d'agir correspundentas e d'instradar eventualmain las optimaziuns.

La polizia è sa fatschentada intensivamain cun ils rapports: sco mesira centrala vegnan rinforzadas la scolaziun e la furmaziun supplementara
La polizia è sa fatschentada en moda detagliada ed autocritica cun ils rapports e cun las recumandaziuns d'agir. L'analisa mussa che differentas mesiras èn gia vegnidas realisadas u èn en realisaziun. Differentas recumandaziuns d'agir pon vegnir realisadas directamain cun ina scolaziun e cun ina furmaziun supplementara rinforzada e coordinada dals commembers dal corp. Per quest intent è vegnida stgaffida ed occupada il cumenzament da l'onn 2020 ina plazza a temp limità per rinforzar la controlla da l'efficacitad da la scolaziun e da la furmaziun supplementara. In'enconuschientscha ch'è vegnida realisada sco mesira immediata, è stada quella che l'obligaziun da documentaziun sto vegnir precisada. Per motivs da la cumplettadad vegn da nov er explitgà en moda transparenta, pertge che la polizia n'exequescha betg acziuns en in cas. Supplementarmain èn vegnids extendids ils rapports dal cader da las partiziuns. Quels vegnan er duvrads per scolaziuns supplementaras dal cader, per exempel per barattar vicendaivlamain infurmaziuns davart cas currents. Plinavant è vegnida scolada la cumplettaziun e l'utilisaziun cumplessiva dal schurnal. Uschia èn vegnids meglierads la communicaziun interna ed il transfer da savida. Ina nova organisaziun da commando (reorganisaziun e rinforzament da la Polizia chantunala sin plaun dal commando) ed il project current "Ulteriur svilup da la structura dals posts" contribueschan supplementarmain ad optimar ils process e las acziuns.

Lantschà il project "Management da smanatschas dal Grischun" – sviluppà in codex da cumportament per reglas da recusaziun
En las recumandaziuns èn vegnids tematisads in "management da smanatschas dal Grischun" e reglas da recusaziun. Actualmain elavurescha il DGSS in concept general "Management da smanatschas dal Grischun" sco project principal. Per scolar e per sensibilisar tut las collavuraturas e tut ils collavuraturs dal chantun Grischun per las reglas da recusaziun en proceduras ha l'Uffizi da persunal sviluppà in codex da cumportament ch'è vegnì preschentà a la Regenza sco sboz.

L'APUC ha realisà las recumandaziuns – l'Uffizi da sanadad planisescha ina furmaziun supplementara per medis uffizials
La APUC ha gia realisà la recumandaziun che tut ils andaments e tut las infurmaziuns stoppian vegnir documentadas gia avant che la procedura vegnia averta. Per quest intent ha ella relaschà ina directiva e scolà correspundentamain sias collavuraturas e ses collavuraturs. Per ils medis uffizials vegn preparada ina furmaziun supplementara davart il tema dal plazzament per motivs da provediment. Ultra da quai vegnan revedids las directivas ed il manual en chaussa. Quest proceder è vegnì proponì correspundentamain en las recumandaziuns.

Il cusseglier guvernativ Peter Peyer controlla la realisaziun da las mesiras
L'elavuraziun autocritica dals eveniments e da las recumandaziuns d'agir è stada – tenor cusseglier guvernativ Peter Peyer – d'ina impurtanza centrala per tut las autoritads ed è vegnida considerada sco schanza. L'analisa da la Polizia chantunala dal Grischun mussia ch'ella funcziunia e che sia organisaziun n'haja nagins sbagls sistemics centrals. Il DGSS ha giuditgà las analisas ed il proceder da tut ils uffizis e resguarda quellas sco confurmas a las finamiras. Per entant sto regularmain vegnir dà pled e fatg davart lur realisaziun, davart l'adempliment da las finamiras e davart eventualas adattaziuns a chaschun da discussiuns tranter il DGSS ed ils uffizis e supplementarmain mintga onn en in rapport.

Servetsch da mediaziun entaifer il departament sco post da consultaziun nunbirocratic per collavuraturas e collavuraturs
Il DGSS vegn a stgaffir in servetsch da mediaziun entaifer il departament per las collavuraturas ed ils collavuraturs. Ina persuna spezialisada u in post spezialisà vegn a manar quel durant 2 onns sco emprova. A collavuraturas e collavuraturs che percepeschan in abus, ma che na pon betg sa drizzar directamain a lur superiuras u superiurs per motivs da l'ierarchia u per motivs persunals, stat uschia a disposiziun in post da consultaziun independent. Suenter la fasa da test vegnan evaluadas las experientschas ed examinadas la cuntinuaziun e l'implementaziun.

Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch


Gremi: Departament da giustia, segirezza e sanadad
Funtauna: rg Departament da giustia, segirezza e sanadad

Neuer Artikel