En vista a la renovaziun previsa da la baselgia refurmada Son Gion a Schiers metta la Regenza la baselgia sut protecziun. Questa baselgia è vegnida construida da l'onn 1519 fin l'onn 1522 sco baselgia catolica. Il chor posseda anc oz l'oriund arvieut a rait da la gotica tardiva. L'arvieut da la nav dal temp da la construcziun è vegnì destruì d'ina explosiun da pulvra durant la sullevaziun en il Partenz l'onn 1622. La construcziun dal tschiel sura da l'onn 1641 è puspè vegnida donnegiada d'in incendi dal vitg l'onn 1767 e remplazzada l'onn suenter – en il senn dal baroc – cun in tschiel sura da gip ad arvieuts plats cun cartuschas da stuc dal stil rococo. Dal medem temp derivan er las autas fanestras ad arvieuts plats, che dattan glisch a l'edifizi sacral.
Cun giuditgar il cas è sa tschentada principalmain la dumonda, sche l'equipament da l'interiur, ch'è vegnì construì l'onn1928, duai vegnir mess sut protecziun. Quest equipament è vegnì planisà da l'architect da San Murezzan Nicolaus Hartmann il giuven e cuntegna – sco element central – in'orgla plazzada en il chor. Sche quest equipament vegniss mess sut protecziun, na pudess il cumin-baselgia evangelic da Schiers betg renovar la baselgia sco previs e betg duvrar las localitads da baselgia en il mintgadi. La Regenza è vegnida a la conclusiun che l'interess da duvrar la baselgia valia dapli che l'interess da mantegnair e da proteger l'equipament da l'interiur. Perquai è quel exceptà da la protecziun.

La Regenza ha abolì la restricziun d'admissiun per il studi da bachelor en inschigneria da medias (media engineering / multimedia production, MMP) a la Scola auta spezialisada dal Grischun (SASGR) per il cumenzament da l'onn da studi 2020/21. La premissa per vegnir admess al studi è anc adina quella da reussir cun success l'examen da qualificaziun.
Per il studi da MMP vala dal 1. da settember 2018 fin ils 31 d'avust 2021 ina restricziun d'admissiun da 99 studentas e students per onn da studi. Cun il conclus da la Regenza pertutgant l'aboliziun da la restricziun pon cumenzar l'atun 2020 excepziunalmain var 30 ulteriuras studentas e students cun il studi. Durant il semester da primavaira 2020 ha gì lieu l'instrucziun – en connex cun la pandemia dal coronavirus – principalmain sin via da l'emprender a distanza. Las experientschas ch'èn resultadas da quai permettan ussa d'augmentar il dumber da studentas e students

© Scola auta spezialisada dal Grischun

Per l'onn 2020 ha la Regenza concedì ina contribuziun chantunala da circa 691 200 francs per renovar mirs sitgs. Durant l'onn 2020 duain vegnir renovads mirs sitgs d'ina lunghezza da tut en tut circa trais kilometers en las vischnancas dad Alvra, Andeer, Avras, Bravuogn-Filisur, Bever, Bregaglia, Brusio, Calanca, Castaneda, Casti-Vargistagn, Tavau, Tumleastga, Donat, Haldenstein, Lumnezia, Malans, Puschlav, Valragn, Rossa, Sta. Maria i.C., San Vittore, Scharàns, Seglias, Scuol, Valsot, Sumvitg, Surses, Val Müstair, Val S. Pieder, Vaz e Ziràn-Reschen.
Ils mirs sitgs, sco mirs da cunfin e da sustegn, èn en bleras regiuns dal Grischun perditgas impurtantas d'ina cultivaziun tradiziunala. Plinavant furman els savens spazis da viver impurtants per reptils, per mammals pitschens e per insects ed han savens ina flora interessanta (litgens, mistgels, ervas). Els n'han betg mo ina gronda impurtanza per l'istorgia culturala, mabain er per l'ecologia e per la cuntrada.

mir sitg Parc Ela © Lorenz A. Fischer

Ord la finanziaziun speziala Sport conceda la Regenza pliras contribuziuns a centers da trenament regiunals e naziunals che han lur sedia e che adempleschen lur activitad principala en il chantun Grischun. Ultra da quai ston ils centers da trenament pudair cumprovar in concept da juniors da la Federaziun naziunala sco er ina contribuziun per la promoziun da juniors da Swiss olympic. Uschia conceda la Regenza tut en tut a 39 centers da trenament contribuziuns d'ina summa da circa 676 000 francs.