Cuntegn da la pagina

Bain infurmà: la nova pagina d'internet per persunas che assistan e tgiran confamigliars en il Grischun

  • Erste Mitteilung
  • Neuen Beitrag einfügen

Il chantun Grischun ha lantschà la plattafurma d'infurmaziun www.angehoerige-betreuen.gr.ch. La plattafurma sa drizza a persunas che assistan u tgiran confamigliars sco er als patruns da quellas. Sin la plattafurma stat a disposiziun ina collecziun d'infurmaziuns variadas.

Saja quai l'assistenza dals geniturs che basegnan tgira, la tgira dal partenari u l'assistenza d'in uffant grevamain malsaun: dapli che la mesadad da tut las Grischunas e da tut ils Grischuns s'occupan da la tgira u da l'assistenza da confamigliars en il decurs da lur vita. Per ch'els possian s'infurmar meglier davart las pussaivladads da sustegn ha il chantun Grischun lantschà ina nova plattafurma d'infurmaziun.

Infurmaziuns variadas, structuradas en moda simpla
La plattafurma sa drizza als confamigliars d'umans che basegnan tgira u assistenza en tut las fasas da la vita, sco er als patruns da quests confamigliars. Ils confamigliars chattan infurmaziuns davart las pussaivladads existentas da distgargia persunala u da sustegn finanzial, dentant er cussegls per la cumpatibilitad cun l'activitad da gudogn. Ils patruns pon s'infurmar davart ils dretgs e las obligaziuns e survegnan ideas per pudair sustegnair las lavurantas ed ils lavurants en lur situaziuns difficilas. In element impurtant da la plattafurma è la banca da datas cumplessiva dals contacts e da las adressas dals servetschs da sustegn.

Sustegn e distgargia urgentamain necessaris per persunas che assistan lur confamigliars
Las persunas pertutgadas ston supportar in grev squitsch da temp e lur chargia è gronda, perquai ch'ellas pratitgeschan savens er ina professiun. Tgirar confamigliars e pratitgar ina professiun il medem mument è ina sfida immensa. Las chargias corporalas, finanzialas ed emoziunalas da las persunas che assistan e tgiran lur confamigliars pon er avair effects negativs sin la sanadad. La gronda chargia dubla na las permetta savens betg da sa laschar cussegliar professiunalmain u da sa procurar ina survista da las purschidas e dals servetschs existents. Enquistas han mussà ch'igl è in grond basegn d'avair in lieu, en il qual las infurmaziuns relevantas vegnan collecziunadas e messas a disposiziun. Questa largia serra il chantun Grischun cun la plattafurma d'infurmaziun. Ella serva sco ovra da consultaziun digitala, perquai che las persunas pertutgadas ston – avant ch'ellas pon far diever d'agid u profitar da las pussaivladads – enconuscher quai.

Il chantun Grischun spera da pudair sustegnair las persunas che assistan e tgiran lur confamigliars en lur lavur gratuita e preziusa. El prevesa ulteriuras mesiras per meglierar las cundiziuns generalas. Plinavant ha el integrà questas mesiras sco prioritad en il Program da la Regenza 2021 – 2024.

Infurmaziuns:
Christiane Eggert, manadra dal project Persunas che tgiran lur confamigliars, Uffizi da sanadad dal Grischun, Promoziun da la sanadad e prevenziun, tel. +41 81 257 64 09 u +41 78 686 58 83, e-mail Christiane.Eggert@san.gr.ch

Signet Regierungsprogramm 2021-2024


Gremi: Uffizi da sanadad
Funtauna: rg Uffizi da sanadad

Neuer Artikel