Navigaziun principala

Cuntegn da la pagina

La Cussegliaziun da geniturs dal Grischun vegn organisada da nov sin plaun regiunal

  • Erste Mitteilung
  • Neuen Beitrag einfügen

Per il 1. da fanadur 2020 vegn la Cussegliaziun per mammas e per babs organisada sin plaun regiunal e survegn il nov num Cussegliaziun da geniturs. La purschida da basa simpla da la Promoziun da la sanadad e prevenziun stat a disposiziun en l'entir chantun per famiglias cun uffants, e quai da la naschientscha da l'uffant fin ses 5. anniversari.

Fin ussa era la Cussegliaziun da geniturs organisada en moda centrala sur il post spezialisà KJBE. In'analisa cumplessiva da la situaziun ha mussà ch'ella dovra ina nova organisaziun. En enclegientscha cun las parts participadas ha l'Uffizi da sanadad tschernì ina furma d'organisaziun sin plaun regiunal cun set instituziuns purtadras da las regiuns da provediment da la sanadad Churer Rheintal, Engiadina Bassa/Val Müstair, Surselva, Mesolcina/Calanca, Oberengadin/Valposchiavo/Bregaglia, Prättigau/Davos, Heinzenberg/Domleschg/Hinterrhein/Albula/Oberhalbstein. Questa organisaziun vala a partir dal 1. da fanadur 2020.

Dapli libertad d'agir per circumstanzas regiunalas
Il servetsch da la Cussegliaziun da geniturs vegn integrà en la purschida da la Promoziun da la sanadad e prevenziun da las regiuns e garantì tras ils centers dal provediment da la sanadad respectivs sin basa d'ina incarica da prestaziun. Las cussegliadras vertentas han tuttas survegnì in contract d'affiliaziun tar ils novs patruns. L'Uffizi da sanadad surpiglia la direcziun strategica e coordinativa, la garanzia da la colliaziun ed il management da qualitad. Per quest intent ha el survegnì dapli persunal. La Cussegliaziun da geniturs ademplescha pia vinavant la pretensiun da las incumbensas e da la qualitad accordada sin plaun chantunal, ha però – grazia a la nova organisaziun – dapli libertad d'agir per resguardar las circumstanzas en las differentas regiuns. Ulteriuras infurmaziuns pertutgant las instituziuns purtadras sin plaun regiunal chattais Vus sin la pagina d'internet da l'Uffizi da sanadad.

La purschida da la Cussegliaziun da geniturs dal Grischun
La Cussegliaziun da geniturs è ina purschida che sustegna las famiglias ed è l'emprim post da consultaziun per dumondas da tut gener da la naschientscha da l'uffant fin ses 5. anniversari. La purschida da cussegliaziun cumpiglia ils temas svilup ed educaziun, tezzar, nutriment, promoziun dal moviment, promoziun da la sanadad e prevenziun, protecziun d'uffants sco er famiglia. Ultra da discurs da cussegliaziun sin termin ed ultra da visitas a chasa, èn pussaivlas er cussegliaziuns avertas senza preannunzia. Plinavant pon ils geniturs profitar da la cussegliaziun al telefon e dal sustegn via e-mail. Nossa cussegliaziun è da tut temp voluntara, discreta e gratuita. Las cussegliadras èn persunas spezialisadas scoladas dal sectur da sanadad e social ed han in'experientscha da plirs onns. Ellas èn colliadas bain en lur regiun ed ina cun l'autra, e la collavuraziun cun auters champs è garantida.

Infurmaziuns:
Denise Rudin, Uffizi da sanadad dal Grischun, manadra da la partiziun Promoziun da la sanadad e prevenziun, tel. +41 81 257 64 02, e-mail Denise.Rudin@san.gr.ch


Gremi: Uffizi da sanadad
Funtauna: rg Uffizi da sanadad

Neuer Artikel