Il Departament d'educaziun, cultura e protecziun da l'ambient ha nominà Bruno Juhasz sco nov manader da la Cussegliaziun da professiun, da studi e da carriera (CPSC). En questa funcziun è el responsabel per la direcziun generala da la partiziun cun circa 25 collavuraturas e collavuraturs.
Il Departament d'educaziun, cultura e protecziun da l'ambient ha elegì Bruno Juhasz che ha 47 onns, sco nov manader da la CPSC. Il 1. d'avust 2020 daventa el successur da Vendelin Cabernard che banduna la CPSC suenter 10 onns sco manader da partiziun e sco cussegliader.
Bruno Juhasz è stà manader da la Politica da furmaziun tar l'Associaziun cooperativa Migros (direcziun da las scolas da club e dals stabiliments da temp liber). En questa funcziun è el er stà commember da la suprastanza d'organisaziuns externas da la furmaziun professiunala superiura e da la furmaziun fundamentala. Avant questa activitad ha Bruno Juhasz surpiglià – sco commember dal cader da las scolas da club Migros da la Svizra orientala (sparta sanadad) – durant 8 onns la responsabladad per la direcziun strategica e professiunala sco er finanziala da quellas.
Bruno Juhasz è tranter auter scolader cun certificat professiunal federal e posseda in diplom federal sco manager turissem da sanadad e moviment. Dapi l'onn 2019 fa el plinavant part da la suprastanza centrala da la Furmaziun professiunala svizra (FPS).
L'Uffizi per la furmaziun professiunala è cumpetent per tut las dumondas da la furmaziun fundamentala professiunala e cumpiglia ils secturs Cussegliaziun da professiun, da studi e da carriera, Surveglianza dals emprendissadis, Cussegliaziun da las scolas professiunalas, Atelier d'emprendissadi per la creaziun da vestgadira e subvenziunescha differents furniturs da prestaziuns.
Fotografia agiuntada:
Infurmaziuns:
Curdin Tuor, manader da l'Uffizi per la furmaziun professiunala, tel. +41 81 257 27 70, e-mail Curdin.Tuor@afb.gr.ch
Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient