Navigaziun principala

Cuntegn da la pagina

50 onns Servetsch psicologic da scola en il Grischun: partenari per scolas e famiglias

  • Erste Mitteilung
  • Neuen Beitrag einfügen

Il Servetsch psicologic da scola (SPS) vegn savens consultà en tut las regiuns dal chantun per in'expertisa davart il svilup e davart l'emprender. Quest onn festivescha el ses giubileum da 50 onns.

Avant 50 onns ha il SPS cumenzà cun sia lavur. La gronda individualisaziun, novs models da rollas e da famiglia u las medias electronicas han midà fitg ferm la societad dapi lura. Er l'impurtanza d'ina buna furmaziun è vegnida cleramain pli gronda. Il SPS porscha oz tranter auter sustegn en cas da dumondas davart difficultads d'emprender, davart autissem (u auters disturbis), davart problems emoziunals e davart sfidas d'educaziun (p.ex. medias electronicas). Per fortuna darar vegn el er consultà en cas d'urgenza sco suicidis u mortoris.

Neuer Artikel

In svilup saun stat en il center

En il center da l'incumbensa dal SPS stat adina il svilup saun dals uffants e dals giuvenils. En tut las regiuns dal chantun ed en tut las linguas chantunalas sustegnan las collavuraturas ed ils collavuraturs las scolas e las famiglias en lur incumbensa da furmaziun e d'educaziun. Ils geniturs giavischan per lur uffants ina buna carriera da furmaziun, en spezial sch'i dat difficultads da svilup u d'emprender. Las scolas dovran qua basas da decisiun fundadas e cussegls da promoziun per scolaras e scolars cun basegns spezials. Cun la distanza necessaria, cun las enconuschientschas dal sistem da scola e cun la confidenzialitad dal secret professiunal poi vegnir sustegnì en moda simpla. Las annunzias vegnan fatgas cun il consentiment dals geniturs. La moda da proceder vegn discutada mintgamai cun ils geniturs e cun la scola ed adattada a las dumondas.

Il SPS festivescha ses giubileum da 50 onns cun in'occurrenza che ha lieu ils 9 da settember 2020 cun giasts envidads dal sectur da furmaziun. En quest connex vegn discutada la dumonda "Uffanza: basa per ina vita ventiraivla? Tge pon la famiglia e la scola contribuir en chaussa?".

Foto Schulpsychologischer Dienst

 

Infurmaziuns:
Georges Steffen, Uffizi per la scola populara ed il sport, manader da la partiziun Servetsch psicologic da scola, tel. +41 81 257 27 41, e-mail Georges.Steffen@avs.gr.ch


Gremi: Uffizi per la scola populara ed il sport
Funtauna: rg Uffizi per la scola populara ed il sport