Cuntegn da la pagina

Communicaziun da la Regenza dals 2 da fanadur 2020

  • Erste Mitteilung
  • Neuen Beitrag einfügen
La Regenza ha prolungà il termin d'annunzia per sustegns or dal fond per cas da direzza en connex cun il coronavirus. Plinavant ha ella approvà in project per curreger la via da Stussavgia e concedì ina contribuziun chantunala per construir in nov hotel a Churwalden.

Coronavirus: prolungà il termin d'annunzia per sustegns or dal fond per cas da direzza

Per reducir cas da direzza economics en connex cun il coronavirus ha il chantun endrizzà in fond da totalmain 10 milliuns francs per cas da direzza (communicaziun a las medias dals 28 da matg 2020). Interpresas pli pitschnas che han lur sedia en il Grischun, che han ina svieuta annuala da maximalmain 2,5 milliuns francs e ch'èn pertutgadas spezialmain fitg da las mesiras uffizialas per cumbatter il coronavirus, vegnan uschia sustegnidas cun contribuziuns à fonds perdu da fin 30 000 francs.
La Regenza ha prolungà il termin per inoltrar dumondas fin ils 31 d'avust 2020. En lur dumonda ston las interpresas preschentar e motivar, pertge ch'in cas da direzza è avant maun tar ellas respectivamain pertge ch'ellas èn pertutgadas spezialmain fitg. A la dumonda ston vegnir agiuntads ils documents necessaris.

Ulteriuras infurmaziuns sa chattan sin la pagina d'internet dal Departament d'economia publica e fatgs socials, sin la pagina d'internet dal fond per cas da direzza sco er sin il fegl d'infurmaziun tar il fond per cas da direzza.

Per reducir cas da direzza economics en connex cun il coronavirus ha il chantun endrizzà in fond da totalmain 10 milliuns francs per cas da direzza (communicaziun a las medias dals 28 da matg 2020).

Renovaziun d'ina part da la via da Stussavgia

La Regenza ha dà glisch verda ad in project per curreger la via da Stussavgia tranter Aspen e Stussavgia Neukirch. Il traject d'ina lunghezza dad 1,3 kilometers na correspunda betg pli a las pretensiuns dad oz envers ina via chantunala da colliaziun. Plinavant ha la cuvrida donns e sfessas ch'èn d'attribuir ad ina surstructura insuffizienta da la via. Questa surstructura duai vegnir remplazzada en il rom dal project. Ina part integrala dal project è tranter auter er quella da schlargiar la via a 4,2 meters. Pervia da las costas da grip stippas da la vart da la muntogna vegn la via schlargiada cunzunt da la vart da la val. Ils mirs da sustegn existents da la vart da la val vegnan per il solit spazzads e reconstruids da nov in pau pli enavant. Il trassé projectà suonda per gronda part la via existenta. Ils custs totals da quest project importan circa 15,75 milliuns francs.

Abschnitt der talseitigen Stützmauer der Safienstrasse

La Regenza ha dà glisch verda ad in project per curreger la via da Stussavgia tranter Aspen e Stussavgia Neukirch.

Contribuziun chantunala per construir da nov il Sporthotel Krone a Churwalden

Per construir in nov Sporthotel Krone a Churwalden ha la Regenza concedì ina contribuziun chantunala da maximalmain 1 milliun francs. Suenter la spazzada da l'Hotel Krone existent duai vegnir construì in nov hotel sco er var 15 abitaziuns secundaras. L'hotel duai avair 87 chombras e totalmain 190 letgs. El sa chatta en la vischinanza directa dal portal Churwalden ch'è vegnì realisà avant paucs onns e che marchescha l'access al territori da sport da naiv Arosa-Lai. La pista ennavada che maina giu en la val finescha medemamain en la vischinanza directa dal nov cumplex planisà. Il chantun sustegna la nova construcziun sco purschida d'alloschament impurtanta per l'economia regiunala e per promover il svilup turistic regiunal.

Visualisierung des Sporthotel Krone: Wohnungen und Hotel Visualisierung des Sporthotel Krone: Eingang Hotel

© Architekten Linear Projekt AG Stans

Per construir in nov Sporthotel Krone a Churwalden ha la Regenza concedì ina contribuziun chantunala da maximalmain 1 milliun francs.

Drenascha da las aclas da Brinzauls

Dapi passà 100 onns è documentada la bova da Brinzauls. Isa tracta da process da crudadas e da bovas che pericliteschan il vitg. Durant ils ultims 2 onns è la bova s'accelerada fermamain. La sveltezza da la bova pudess vegnir franada, sche la drenascha da las aclas da Brinzauls funcziunass correctamain. Per quest intent ha la Regenza approvà il project "Drenascha da las aclas da Brinzauls" e concedì ina contribuziun chantunala da var 2,14 milliuns francs. Il project cumpiglia la reparaziun da la drenascha existenta da las aclas da Brinzauls, che n'è actualmain dentant betg pli effizienta.

Brienzer Maiensäss Sicht zum Tal Brienzer Maiensäss Sicht zum Berg

© Büro für Technische Geologie AG (BTG AG)

Dapi passà 100 onns è documentada la bova da Brinzauls. Isa tracta da process da crudadas e da bovas che pericliteschan il vitg. La sveltezza da la bova pudess vegnir franada, sche la drenascha da las aclas da Brinzauls funcziunass correctamain.

Glisch verda per rempars da lavinas a Puntraschigna

La Regenza ha approvà il project "Rempars da lavinas e siglientada da lavinas Clüx" a Puntraschigna e concedì ina contribuziun chantunala da 324 000 francs. Numerus irals da lavinas da la flanca sidvest dal Munt da la Bês-cha pericliteschan la vischnanca da Puntraschigna davent dal quartier Punt Muragl al nord fin al Carlihof al sid. Protegì vegn quest sectur da privel tras ils rempars da lavinas Munt da la Bês-cha. La Val Clüx e la costa dal Piz Languard èn zonas enconuschentas da distatga da lavinas entaifer ils rempars da lavinas Munt da la Bês-cha. Cun excepziun d'intgins mirs sitgs èn questas zonas actualmain nunsurbajegiadas. Il terren è fitg stip, uschia che la furmaziun da lavinas pulvrusas vegn favurisada. Il project ha la finamira da meglierar substanzialmain la protecziun cunter lavinas en il territori da privel tras paralavinas d'atschal sco er tras tschintg indrizs fixs per siglientar lavinas.

-

Territori che vegn controllà da nov cun indrizs fixs

La Regenza ha approvà il project "Rempars da lavinas e siglientada da lavinas Clüx" a Puntraschigna e concedì ina contribuziun chantunala da 324 000 francs.

Neuer Artikel
Gremi: Regenza
Funtauna: rg Chanzlia chantunala dal Grischun