Igl è in term impurtant per il Grischun sco lieu d'innovaziuns: Il cumenzament da zercladur han il chantun Grischun e la TECHNOPARK® (Liechtenstein) SA fundà il TECHNOPARK® Grischun. Uschia survegn il Grischun in nov center per interpresas giuvnas da tecnologia en in lieu central a la staziun da Landquart. Il TECHNOPARK® Grischun cumenza sia activitad il 1. da settember 2020. Sco partenaria cun know-how è participada la TECHNOPARK® (Liechtenstein) SA. Questa punt en il pajais vischin sustegna il svilup economic e l'augment da l'attractivitad da tut la regiun davent dal Grischun sur la Val dal Rain fin en il Principadi da Liechtenstein.

Cun il TECHNOPARK® Grischun a Landquart survegn il chantun Grischun in nov center da fundaziun. Il Grischun sco lieu d'innovaziuns vegn uschia rinforzà cleramain – en spezial er en quai che concerna la promoziun d'interpresas giuvnas. A medem temp duai vegnir promovida la cumpetitivitad dal chantun. La finamira è quella da tegnair interpresas giuvnas creativas en il Grischun ubain da las gudagnar per il Grischun. Cun il tecnoparc vegn realisà in ulteriur element da la strategia d'innovaziun dal Grischun. La finanziaziun da partenza per ils emprims 5 onns cun in'opziun per ulteriurs 5 onns vegn garantida dal chantun Grischun. Il chantun fa quint da surpigliar en media custs da 260 000 francs per onn per il manaschi dal tecnoparc.

Il gestiunari dal nov tecnoparc è in'uniun purtadra ch'è vegnida fundada aposta per quest intent. President è il Grischun prof. dr. Rudolf Minsch, ch'è vicedirectur dad economiesuisse, la pli gronda federaziun da tetg da l'economia svizra. El presidiescha la suprastanza che consista da trais persunas e che garantescha l'installaziun ed il manaschi dal tecnoparc. Actualmain vegn tschertgà ina u in mainagestiun per la direcziun operativa dal tecnoparc.

Lavur en allianzas
Il TECHNOPARK® Grischun è integrà da bel principi en ina rait d'innovaziuns pli gronda. Perquai daventa el commember da l'allianza TECHNOPARK® – l'associaziun naziunala dals tecnoparcs che cumpiglia gia set auters tecnoparcs. Il TECHNOPARK® Grischun profitescha uschia dal know-how da quests partenaris per installar ses center. Las interpresas giuvnas sezzas en il tecnoparc profiteschan – en il sectur dal transfer da savida e da tecnologia – da l'access a la rait da partenaris da furmaziun e da perscrutaziun sco la SPF Turitg, las universitads, las scolas autas spezialisadas ed ils instituts da perscrutaziun.

Ultra da quai cooperescha el nà dal cuntegn stretgamain cun il TECHNOPARK® Liechtenstein. Uschia resulta in cluster coerent da savida davent da la Val dal Rain grischuna fin a Vaduz. Las expertas ed ils experts dal center da fundaziun Liechtenstein disponan d'experientscha actuala per installar in tecnoparc e per domiciliar firmas da tecnologia. Cun Othmar Oehri è il CEO dal TECHNOPARK® Liechtenstein er represchentà en la suprastanza da la nova uniun purtadra. Grazia a questa stretga collavuraziun transcunfinala ed a sinergias che resultan tras quella duai la Val dal Rain daventar ina forza transcunfinala en la scena da start-up.

Accent sin firmas da tecnologia
Il focus tematic en il TECHNOPARK® Grischun vegn mess sin la domiciliaziun e sin la promoziun d'interpresas giuvnas da tecnologia e d'export en la fasa iniziala tempriva. Sin basa da las tecnologias-clav definidas en la strategia da scola auta e da perscrutaziun dal chantun Grischun vegn dada in'attenziun speziala a temas sco scienzas da la vita, tecnologia medicinala, fotonica, automaziun, robotica ed ICT. Interpresas giuvnas che vulan sa sviluppar en quests conturns, èn envidadas da sa preschentar al team dal TECHNOPARK® Grischun. Quai pertutga tant interpresas start-up indigenas sco er interpresas giuvnas da l'entira Svizra e da l'exteriur.

Il TECHNOPARK® Grischun è situà centralmain en la Val dal Rain, en vischinanza directa da la staziun da Landquart. En in ambient inspirant sin dus plauns vegnan messas a disposiziun surfatschas per fin 40 plazzas da lavur per interpresas giuvnas.

Ulteriuras infurmaziuns sut:
- Strategia d'innovaziun dal chantun Grischun
- TECHNOPARK® Grischun
- TECHNOPARK® Liechtenstein
- Allianza TECHNOPARK®

Fotografia agiuntad:

Il TECHNOPARK® Grischun sa domiciliescha a la via da la staziun 11 a Landquart.

Infurmaziuns:
- cusseglier guvernativ Marcus Caduff, schef dal Departament d'economia publica e fatgs socials dal Grischun, tel. +41 81 257 23 01, e-mail Marcus.Caduff@dvs.gr.ch
- Roland Moser, collavuratur dal viceschef da la Regenza dal Principadi da Liechtenstein, Ministeri per infrastructura, economia e sport, tel. +423 236 76 68, e-mail roland.moser@regierung.li
- prof. dr. Rudolf Minsch, president da l'uniun TECHNOPARK® Grischun, tel. +41 76 576 11 22, e-mail rudolf@minsch.ch

 

Gremi: Regenza
Funtauna: rg Departament d'economia publica e fatgs socials