La sessiun d'examens da quest onn è stada caracterisada da la pandemia COVID-19. Ils examens d'admissiun chantunals a las scolas medias dal Grischun che han gì lieu ils 11 da favrer ed ils 10 da mars 2020 han pudì vegnir realisads en moda regulara. En cas dals examens finals però han stuì vegnir fatgas adattaziuns pervia da la situaziun extraordinaria. Ma er quests examens han pudì vegnir realisads en tut las scolas medias dal Grischun.
Examens d'admissiun chantunals ad ina scola media grischuna
Tut en tut han 800 scolaras e scolars frequentà ils examens d'admissiun chantunals en ina da las totalmain nov scolas medias grischunas. L'onn precedent eran quai 759 candidatas e candidats. Da 398 scolaras e scolars da la 6. classa primara han 220 (55,3 pertschient) reussì l'admissiun a la 1. classa dal gimnasi da 6 onns (uschenumnà gimnasi da lunga durada) – 178 (44,7 pertschient) n'han gì nagin success. Areguard il total da scolaras e scolars da la 6. classa primara (1681) importa la quota da giuvenils admess a la 1. classa dal gimnasi da lunga durada passa 13 pertschient. Quai correspunda circa a la quota da l'onn precedent.