Dapi il cumenzament da la stad stat la nova rubrica "Statistica da pestga dal Grischun" a disposiziun sin la pagina d'internet da l'Uffizi da chatscha e pestga (UCP). Quest instrument interactiv permetta da tschertgar datas individualas en las bancas da datas da la vendita da patentas, da la pestga e da la populaziun da peschs dal UCP.

Grazia a la statistica da pestga dal Grischun pon vegnir fatgas consultaziuns da datas sin mesira. L'utilisadra u l'utilisader po per exempel laschar preschentar ils dumbers da peschs pigliads en ils lais da muntogna d'ina tscherta regiun dal Grischun u las midadas da la populaziun da peschs en las auas dal Grischun durant ils ultims onns. Cun quest instrument interactiv fa il UCP in ulteriur pass en direcziun d'ina lavur da publicitad moderna e d'ina transparenza maximala. La finamira è quella da porscher a la populaziun in access uschè facil sco pussaivel al stgazi da datas davart la pestga dal Grischun.

Bunas infurmaziuns grazia a l'agid da las pestgadras e dals pestgaders
Las infurmaziuns ch'èn cuntegnidas en las datas davart la pestga e che vegnan registradas mintga onn davart las auas en il Grischun e davart la populaziun da peschs, èn multifaras. Quai mussa la statistica da pestga dal Grischun. Questas datas èn fitg preziusas ed han ina gronda impurtanza per inditgar midadas en il sistem ecologic da las auas. En quest connex stoi vegnir engrazià spezialmain a las pestgadras ed als pestgaders dal Grischun. Cun manar exactamain lur statistica da pestga contribueschan ellas ed els essenzialmain a la fitg buna qualitad da las datas ed a la forza expressiva da la statistica da pestga dal Grischun.