L'Uffizi da sanadad avertescha da negligientscha e recumonda urgentamain d'observar strictamain las reglas da distanza e d'igiena. Il dumber da persunas cun in test positiv sco er il dumber da persunas en quarantina èn s'augmentads ils ultims dis. Quai che dat spezialmain en egl: Er persunas che purtavan in visier da plastic per sa proteger, èn vegnidas infectadas.
Il dumber da persunas ch'èn s'infectadas da nov cun il coronavirus è creschì. Dumengia saira, ils 12 da fanadur 2020, eran 10 persunas en isolaziun e 136 persunas en quarantina. Actualmain ston duas persunas vegnir tgiradas en in ospital en il chantun Grischun. Il contact tracing funcziuna vinavant e las resursas necessarias da persunal han pudì vegnir garantidas svelt, malgrà il volumen creschent.
Dals cas positivs en il champ da vacanzas dal di a Zuoz e da la bar a Cuira n'èn resultadas fin ussa naginas infecziuns successivas. Las persunas da contact èn anc adina en quarantina. En l'hotel a Puntraschigna hai dà in'ulteriura infecziun. Quella è dentant succedida gia avant intgins dis. Tut en tut èn ussa 6 persunas malsaunas.
Visiers da plastic na protegian betg en moda fidada
L'analisa dals cas e da las vias d'infecziun han mussà ch'ils visiers da plastic, che vegnan duvrads en spezial en la gastronomia, na protegian betg suffizientamain cunter ina infecziun. Pervia da quai recumonda la media chantunala da betg duvrar mo visiers da plastic, perquai che quels dattan in fauss sentiment da segirezza. Sche la distanza dad 1,5 meters na po betg vegnir observada, vegni recumandà da purtar mascrinas da protecziun u da prender autras mesiras adattadas. En vista a la stagiun da stad vegni recumandà als manaschis, ch'èn sa fidads fin ussa ch'ils visiers da plastic sajan segirs, da reveder lur concepts da protecziun.
Evitar ulteriuras mesiras rigurusas
La finamira è quella d'evitar sche pussaivel ulteriuras mesiras rigurusas. Quellas avessan consequenzas considerablas per l'economia, en spezial per interpresas e per il turissem. L'Uffizi da sanadad appellescha tant a la populaziun sco er als manaschis d'observar las prescripziuns. Particularmain en vista al temp da vacanzas recumonda l'Uffizi da sanadad vinavant urgentamain d'observar strictamain la regla da distanza dad 1,5 meters, las mesiras d'igiena generalas e l'obligaziun da purtar mascrinas da protecziun en il traffic public. Igl è da tegnair distanza da fullas da glieud, en spezial en locals serrads. Als manaschis vegni recumandà d'examinar cuntinuadamain lur concepts da protecziun e sche necessari d'adattar quels.
Per proteger la populaziun e per pudair desister da mesiras supplementaras ston vegnir interruttas uschè svelt sco pussaivel las chadainas d'infecziun. Quai vegn fatg cun repersequitar ils contacts (contact tracing) e cun metter en quarantina las persunas da contact sco er en collavuraziun cun las vischnancas. Questas mesiras èn sa cumprovadas fin ussa per interrumper las chadainas d'infecziun. L'Uffizi da sanadad appellescha tuttina a l'atgna responsabladad e recumonda da tegnair distanza uschenavant sco pussaivel, da sa proteger cun mascrinas, d'inditgar las datas da contact correctas e da far diever da l'app SwissCovid, sch'ins visita in'occurrenza, in restaurant u ina bar.
Infurmaziuns:
Marina Jamnicki, media chantunala, Uffizi da sanadad dal Grischun, tel. +41 81 257 26 46, e-mail Marina.Jamnicki@san.gr.ch
Gremi: Uffizi da sanadad
Funtauna: rg Uffizi da sanadad