Cuntegn da la pagina

Nov triep da lufs en Surselva

  • Erste Mitteilung
  • Neuen Beitrag einfügen

Sco gia supponì pli ditg è sa furmà in nov triep da lufs en l'intschess dal Rain anteriur. Il nov triep survegn la designaziun "triep da Stagias". L'emprima conferma deriva da la vischinanza da Sedrun.

La gronda preschientscha dal luf en ils conturns da Sedrun e da Mustér ha furnì gia pli ditg indizis ch'i vegnia a sa furmar in ulteriur triep da lufs en questa regiun. Ussa è vegnida confermada questa supposiziun. Fin ussa han ins pudì observar trais animals giuvens. Il revier dal nov triep cumpiglia il territori da Sursassiala e s'extenda sur ils territoris communals da Tujetsch, da Mustér e da Medel (Lucmagn). Cun il nov triep èn ussa confermads – ensemen cun il triep da Morobbia al cunfin cun il chantun Tessin – sis trieps che han lur territori da chatscha en il chantun Grischun.

Trieps da lufs enconuschents han medemamain fatg pitschens
En la Mantogna, enturn il Glaspass, han tant nurseras sco er la surveglianza da chatscha da l'Uffizi da chatscha e pestga dal chantun Grischun udì pliras giadas cloms da lufs pitschens. Qua tras vegn confermada la supposiziun ch'il triep dal Beverin è sa reproducì. I n'è dentant anc betg cler, da quants lufs giuvens ch'i sa tracta.

Sin in'alp al nord da Glion ha la surveglianza da chatscha pudì observar dus lufs creschids cun tschintg lufs giuvens. Il lieu d'observaziun lascha supponer ch'i sa tractia qua dal triep dal Piz Bargias. Cumbain ch'ils animals han pudì vegnir observads durant ina lunga perioda, na poi betg vegnir exclus che passa tschintg lufs giuvens appartegnan al triep.

Er a Sursaissa hai dà indizis ch'il triep da Valgronda haja puspè survegnì pitschens quest onn. Er qua na pon anc vegnir fatgas naginas indicaziuns davart il dumber da lufs giuvens.

Ulteriuras observaziuns da lufs giuvens èn pussaivlas
Naginas infurmaziuns na datti per il mument davart eventuals lufs giuvens tar il triep dal Calanda. I n'è anc adina betg cler, sche novs animals dominants han surpiglià il triep e sche quels han fatg pitschens. Er betg enconuschent n'èsi per il mument, sche novs trieps èn sa furmads en autras regiuns dal chantun Grischun e sche quels han survegnì pitschens.

Fotografia agiuntada:

Jungwolf des Stagias-Rudels

Luf giuven dal triep da Stagias


Infurmaziuns: 
dr. Adrian Arquint, manader da l'Uffizi da chatscha e pestga dal Grischun, tel. +41 81 257 38 92, e-mail Adrian.Arquint@ajf.gr.ch


Gremi: Uffizi da chatscha e pestga
Funtauna: rg Uffizi da chatscha e pestga

Neuer Artikel