Navigation

Inhaltsbereich

  • Erste Mitteilung
  • Neuen Beitrag einfügen

Tegnair distanza e lavar regularmain ils mauns èn las mesiras las pli effectivas per sa proteger cunter il coronavirus. En vista al di da la festa naziunala appellescha l'Uffizi da sanadad a l'atgna responsabladad e recumonda urgentamain d'observar las reglas da distanza e d'igiena.

Las emnas passadas hai dà in augment dals cas en il Grischun. En blers cas è il virus vegnì transmess perquai ch'ins ha tralaschà da tegnair distanza. En vista al di da la festa naziunala cusseglia l'Uffizi da sanadad pia urgentamain d'observar las reglas da distanza e d'igiena.

Concretamain recumonda l'Uffizi da sanadad da tegnair distanza uschenavant sco pussaivel, da sa proteger cun mascrinas, d'inditgar las datas da contact correctas e da far diever da l'app SwissCovid, sch'ins visita in'occurrenza, in restaurant u ina bar.

Uffants e giuvenils cun sintoms restan a chasa!
Malsognas chaschunadas dal nov coronavirus pon sa manifestar en moda fitg differenta. Tscherts umans n'han nagins sintoms u na badan strusch ch'els èn malsauns. Il cas da las emnas passadas han mussà, quant malign ch'il nov coronavirus è; persunas senza sintoms visibels han derasà il virus entaifer curt temp e senza badar quai.

L'Uffizi da sanadad avertescha ils geniturs dal transferiment simpel dal virus. Pervia da quai recumonda el urgentamain da tegnair a chasa uffants cun sintoms sco dafraid, fevra, tuss, mal la gula e.u.v. e da consultar in medi. En nagin cas na dastgan uffants e giuvenils sa participar a purschidas da vacanzas e da gruppa – sco per exempel champs da vacanzas, pass da vacanzas u occurrenzas sumegliantas –, sch'els han sintoms d'ina malsogna. Uschia vegni impedì che ulteriuras persunas vegnian infectadas.

Situaziun actuala
En il Grischun sa chattan actualmain tut en tut 61 persunas en isolaziun, var 350 persunas en quarantina, ed 1 persuna vegn tgirada en in ospital.

L'Uffizi da sanadad analisescha d'in cuntin il dumber da cas ed examinescha mesiras correspundentas. El vegn ad adattar il dumber da contact tracers al volumen effectiv. Sco emprima prioritad ston las persunas directamain pertutgadas e lur conturns vegnir contactads uschè svelt sco pussaivel ed a medem temp ston vegnir protegids ils dretgs persunals individuals. Ulteriuras infurmaziuns vegnan dadas mo en cas, tar ils quals è avant maun in interess public predominant. Uscheditg ch'il contact tracing funcziuna, vegni desistì d'ordinar ulteriuras mesiras sco per exempel l'extensiun da l'obligaziun da purtar ina mascrina.

La circulaziun da las infurmaziuns è garantida
Las 4 emnas, durant las qualas n'han gì lieu naginas sesidas da la Regenza, è la circulaziun da las infurmaziuns tranter ils commembers da la Regenza sco er entaifer ils departaments stada garantida da tut temp. Sco gia durant ils mais passads han gì lieu conferenzas da telefon e da video er durant il fanadur, e quai malgrà las absenzas pervia da vacanzas. Mardi che vegn sa scuntra la Regenza per la proxima sesida ordinaria.


Infurmaziuns: 
- cusseglier guvernativ Peter Peyer, schef dal Departament da giustia, segirezza e sanadad, tel. +41 79 629 00 85 (da las 13.00 fin las 15.00)
- Rudolf Leuthold, manader da l'Uffizi da sanadad, tel. +41 81 257 26 41, e-mail Rudolf.Leuthold@san.gr.ch


Gremi: Departament da giustia, segirezza e sanadad
Funtauna: rg Departament da giustia, segirezza e sanadad

Neuer Artikel