Navigaziun principala

Cuntegn da la pagina

Coronavirus: garantì a lunga vista in'organisaziun da persunal per dumagnar l'epidemia COVID-19

  • Erste Mitteilung
  • Neuen Beitrag einfügen

Cun resursas da persunal supplementaras e cun andaments definids vegni garantì ch'il chantun possia ademplir las incumbensas, che stattan en connex cun il coronavirus, en moda efficazia e per il bain da tut las parts participadas, en spezial per la populaziun e per l'economia. Per quest intent vegn affiliada ina nova partiziun a l'Uffizi da sanadad dal Grischun.

Cunquai che la situaziun è vegnida degradada dal Cussegl federal a la situaziun speziala ils 22 da zercladur 2020, èn ils chantuns vegnids obligads d'exequir las mesiras per franar l'epidemia da COVID‑19. Uschia per exempel cun conceder permissiuns excepziunalas per occurrenzas, cun endrizzar il post d'annunzia per persunas ch'entran da l'exteriur u cun realisar il contact tracing. Ultra da quai pon ils chantuns concluder er mesiras pli severas sco per exempel l'obligaziun da purtar ina mascrina en la publicitad.

Installaziun d'ina partiziun COVID‑19 tar l'Uffizi da sanadad
Per pudair dumagnar a lunga vista las incumbensas en connex cun il coronavirus, che la Confederaziun ha surdà al chantun e per las qualas el è cumpetent, ha il chantun – en la situaziun speziala da la Confederaziun e da la situaziun normala en il chantun Grischun ch'è resultada da quai – concludì da stgaffir in'organisaziun correspundenta sut la direcziun da l'Uffizi da sanadad. Uschia vegn en sasez installada ina partiziun COVID‑19 tar l'Uffizi da sanadad, ch'è occupada cun persunas spezialisadas dals secturs organisaziun, sanadad, dretg e communicaziun.

Las summas da salari supplementaras vegnan finanziadas l'onn 2020 sur transferiments da preventivs da salari betg duvrads en posts da servetsch da l'administraziun chantunala. Per ils onns 2021 e 2022 vegn dumandà in credit d'impegn correspundent dal Cussegl grond.

La partiziun COVID‑19 nova da l'Uffizi da sanadad vegn a surpigliar il cumenzament da settember las localitads da l'Uffizi da chatscha e pestga a la Loestrasse 14/16 e cumpigliar e metter a disposiziun per entant 16 plazzas da lavur che vegnan duvradas per il contact tracing u per ulteriuras lavurs en connex cun COVID‑19.

Discutà occurrenzas grondas e l'obligaziun da purtar ina mascrina
Sin dumonda dal Departament da giustia, segirezza e sanadad (DGSS) ha la Regenza discutà, sut tge premissas che occurrenzas grondas cun passa 1000 participantas e participants possian eventualmain puspè vegnir permessas. Ed ella ha er discutà davart l'extensiun da l'obligaziun da purtar ina mascrina en il spazi accessibel publicamain, sco p.ex. en restaurants, en butias e negozis u al spurtegl da posta. I n'èn anc vegnids prendids nagins conclus. Quels dependan da l'ulteriur svilup dals dumbers da cas. Uschenavant sco pussaivel duain ulteriuras mesiras vegnir coordinadas cun ils chantuns da la Svizra orientala.

Actualmain sa chattan en il chantun Grischun 28 persunas en isolaziun ed 69 persunas en quarantina. 1 persuna vegn tgirada en in ospital. Las cifras pon sa midar fermamain da di a di.

Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch
- Rudolf Leuthold, Leiter Gesundheitsammanader da l'Uffizi da sanadad, tel. +41 81 257 26 41, e‑mail Rudolf.Leuthold@san.gr.ch


Gremi: Departament da giustia, segirezza e sanadad
Funtauna: rg Departament da giustia, segirezza e sanadad

Neuer Artikel