Navigaziun principala

Cuntegn da la pagina

Coronavirus: cumenzament da la scola e dals emprendissadis en il Grischun

  • Erste Mitteilung
  • Neuen Beitrag einfügen

Il nov onn da scola resp. d'emprendissadi cumenza en il chantun Grischun en tut las instituziuns da furmaziun en moda regulara cun l'instrucziun da preschientscha. Sin basa da la valitaziun da la situaziun actuala n'introducescha il chantun Grischun nagina obligaziun da purtar ina mascrina en las instituziuns da furmaziun per il cumenzament da scola. En collavuraziun cun l'Uffizi da sanadad dal Grischun e cun la media chantunala è vegnì fixà il proceder concernent dumondas che pertutgan la sanadad, en spezial concernent il contact tracing ed il cumportament suenter in test dal coronavirus.

Cumenzament da la scola populara en il Grischun
Il nov onn da scola 2020/21 ha lieu l'instrucziun en las scolas popularas dal chantun Grischun sco instrucziun da preschientscha cun entiras classas. Las mesiras da cumportament e d'igiena èn anc adina centralas. Per la scola populara na datti nagina obligaziun da purtar ina mascrina. Tut tenor la situaziun locala concernent COVID‑19 po ina instituziun responsabla per la scola prescriver a persunas creschidas da purtar ina mascrina en locals che vegnan duvrads cuminaivlamain. Scolaras e scolars da tut las vegliadetgnas u persunas creschidas che returnan d'in territori da ristga definì da la Confederaziun, ston ir per 10 dis en quarantina. Las scolaras ed ils scolars survegnan incumbensas e lezias u pensums.

Cumenzament da la scola sin il stgalim secundar II ed en il sectur da furmaziun terziar dal Grischun
Las infurmaziuns dal Departament d'educaziun, cultura e protecziun da l'ambient (DECA) dals 26 da zercladur 2020 "Princips per realisar las prescripziuns da COVID‑19 da la Confederaziun durant l'onn da scola resp. d'emprendissadi 2020/21" valan vinavant. En las instituziuns da furmaziun dal sectur postobligatoric dal stgalim secundar II (scolas professiunalas spezialisadas, centers da curs intermanaschials, lavuratoris d'emprendissadi, soluziuns transitoricas, scolas medias), dal stgalim terziar (scolas spezialisadas superiuras, scolas autas spezialisadas e scolas autas) e da la furmaziun supplementara n'introducescha il chantun Grischun nagina obligaziun da purtar ina mascrina per il cumenzament da la scola. Questa decisiun sa basa sin l'analisa cuminaivla da la situaziun actuala da l'Uffizi da sanadad, da la media chantunala e dal DECA. Sche las distanzas minimalas na pon betg vegnir observadas e sche naginas autras mesiras da protecziun na pon vegnir realisadas, recumonda il chantun da sa proteger cun mascrinas. Igl è chaussa da las instituziuns da furmaziun da realisar consequentamain las mesiras da cumportament e d'igiena da l'Uffizi federal da sanadad publica tenor lur concept da protecziun che sto vegnir adattà permanentamain. Las instituziuns da furmaziun pon prescriver mesiras pli severas, p.ex. in'obligaziun da purtar ina mascrina en settings d'instrucziun, nua che la distanza minimala na po betg vegnir observada. La cumpetenza e la responsabladad per introducir in'obligaziun da purtar ina mascrina ha la direcziun da l'instituziun da furmaziun.

Sch'ina instituziun da furmaziun prescriva in'obligaziun da purtar ina mascrina, portan las scolaras sezzas ed ils scolars sezs cun sai las mascrinas. Tenor las disposiziuns legalas sto il manaschi d'emprendissadi metter a disposiziun a las emprendistas ed als emprendists l'equipament da protecziun persunal, sco per exempel mascrinas.

Infurmaziuns:
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch


Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient

Neuer Artikel