Navigaziun principala

Cuntegn da la pagina

Communicaziun da la Regenza dals 13 d'avust 2020

  • Erste Mitteilung
  • Neuen Beitrag einfügen
La Regenza ha approvà dus projects da protecziun cunter crudada da crappa sin la via dal Lucmagn sco er in project da renovaziun da vias forestalas a Sursaissa.

Glisch verda per dus projects da protecziun cunter crudada da crappa sin la via dal Lucmagn

Ils ultims 3 onns hai adina puspè dà crudadas da crappa sin la via dal Lucmagn tar il portal sid dal tunnel Caschlatsch en la vischnanca da Mustér. La Regenza ha ussa approvà in project che serva a proteger la via chantunala cunter crudadas da crappa. Per quest intent duai il territori vegnir segirà cun montar in sumbrival da raits d'ina surfatscha totala da var 1000 meters quadrat e cun allontanar ina part dal grip. Il project custa tut en tut 480 000 francs.

Foto Caschlatsch

Cun crudadas da crappa èsi er da quintar sin la via dal Lucmagn en il sectur da la punt Val da Rein en la vischnanca da Medel/Lucmagn. Dus crappuns da var 30 meters cubic e da var 750 meters cubic pericliteschan la punt en la chavorgia dal Rain da Medel. Sin basa dals spustaments activs mesirads pudessan ils crappuns crudar giu entaifer ils proxims decennis sin il med da traffic ch'è situà sutvart. En il rom da quest project duai il territori vegnir segirà cun construir duas armadiras da sustegn da betun che cumpiglian ina lunghezza totala da var 8 meters, cun installar 12 ancras betg tendidas sco er cun allontanar ina part dal grip. Il project custa tut en tut 240 000 francs.

Foto 1 Val da Rein Foto 2 Val da Rein

La Regenza ha approvà dus projects da protecziun cunter crudada da crappa sin la via dal Lucmagn.

Vias forestalas a Sursaissa pon vegnir renovadas

La vischnanca da Sursaissa Mundaun ha l'intenziun da renovar en il territori communal vest l'avertura dal guaud existenta e d'adattar quella als basegns d'ozendi. Las vias forestalas han tranter 30 e 70 onns ed èn per part en in nausch stadi. Ultra da quai èn ellas memia stretgas ed han ina capacitad da chargia insuffizienta. La Regenza ha approvà il project ed ha concedì ina contribuziun chantunala da var 854 000 francs.

En il rom dal project duai la via dad Oberhuot fin Tristel, ch'è 900 meters lunga, tranter auter vegnir schlargiada a 3,3 meters. La capacitad da chargia duai vegnir rinforzada cun ina stabilisaziun da cement, e la cuvrida naira existenta duai vegnir remplazzada tras ina nova stresa da basa d'asfalt. Ultra da quai duai la via che maina dad Oberhuot fin a la punt da Lumbrein e che ha ina lunghezza dad 1,7 kilometers vegnir renovada tranter auter cun schlargiar la via en tscherts lieus, e sin ina lunghezza da 325 meters duain vegnir prolungadas la cuvrida d'isada sco er las chanals traversalas.

Foto Forstwege Obersaxen Mundaun

La vischnanca da Sursaissa Mundaun ha l'intenziun da renovar en il territori communal vest l'avertura dal guaud existenta e d'adattar quella als basegns d'ozendi. La Regenza ha approvà il project ed ha concedì ina contribuziun chantunala da var 854 000 francs.

Neuer Artikel

Gremi: Regenza
Funtauna: rg Chanzlia chantunala dal Grischun