Navigation

Inhaltsbereich

  • Erste Mitteilung
  • Neuen Beitrag einfügen

En il Cussegl turistic dal Grischun datti ina midada dal presidi e tar las commembras ed ils commembers. Thomas Bieger remplazza il president partent Ernst A. Brugger. Marianne Janik e Beat Zaugg fan da nov part dal Cussegl turistic.

Suenter in'activitad da 6 onns sco president dal Cussegl turistic dal Grischun è prof. dr. Ernst A. Brugger sa retratg per motivs da vegliadetgna da ses uffizi per la fin da zercladur 2020. Ernst A. Brugger ha prestà lavur preziusa ils ultims onns ed ha stgaffì cun il "Cudesch alv per il turissem grischun" ina basa da discussiun zunt respectada per l'avegnir dal turissem en il Grischun. Il Cudesch alv è vegnì publitgà il december 2017.

La Regenza ha tschernì prof. dr. Thomas Bieger sco nov president per la perioda d'uffizi currenta fin la fin da l'onn 2021. Thomas Bierger è professer ordinari per economia da manaschi cun resguard spezial dal turissem sco er directur da l'Institut per management sistematic e per governance a l'Universitad da Son Gagl. El ha vastas enconuschientschas specificas, ina chapientscha exprimida per il turissem ed ina gronda rait da contacts naziunals ed internaziunals.

Gremi strategic per l'ulteriur svilup dal turissem
Sco commembras e commembers dal Cussegl turistic dal Grischun èn ultra da quai sa retratgs Jeannine Pilloud (Ascom SA, Baar), Martin Candrian (Candrian Catering, Turitg) e Hansjörg Trachsel (anteriur cusseglier guvernativ, Schlarigna). Tuts trais èn stads commembers dal Cussegl turistic dapi l'onn 2014. Per la perioda d'uffizi currenta fin la fin da l'onn 2021 ed en vista a las sfidas tar la digitalisaziun ha la Regeza tschernì Marianne Janik, CEO Microsoft Svizra ScRL, e sco represchentant dal sectur da sport Beat Zaugg, CEO Scott Sports SA. Il Cussegl turistic dal Grischun ha da nov tut en tut nov commembras e commembers.

En il Program da turissem dal Grischun 2014–2023 occupa il Cussegl turistic il plaun strategic. El cusseglia, senza avair la cumpetenza da decider directa. Sia incumbensa è quella da sviluppar vinavant il sistem turistic general "turissem grischun". Ils ultims onns ha il gremi accumpagnà, examinà e proponì differents projects per la promoziun tras la Regenza. Uschia han pudì vegnir realisadas mesiras per augmentar la cumpetitivitad dal turissem grischun. En il rom dal Program da turissem dal Grischun èn vegnidas garantidas contribuziuns da tut en tut 6,9 milliuns francs a 26 projects tranter ils onns 2014 e 2020.

Er en il futur vul il Cussegl turistic dar impuls. El s'occupa da la digitalisaziun dal turissem grischun (Digital Road Map Grischun) e sa fa patratgs davart il sistem turistic dal Grischun. Il Cussegl turistic è vinavant avert per bunas iniziativas interprendidras e per dumondas da project. Il post da consultaziun primar per dumondas da project è l'Uffizi per economia e turissem che maina il secretariat dal Cussegl turistic dal Grischun.

Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel +41 81 257 23 03, e‑mail Marcus.Caduff@dvs.gr.ch


Gremi: Regenza
Funtauna: rg Chanzlia chantunala

Neuer Artikel