Navigaziun principala

Cuntegn da la pagina

Ulteriurs meds d'instrucziun en ils idioms

  • Erste Mitteilung
  • Neuen Beitrag einfügen

A temp per il cumenzament da l'onn da scola èn cumparids en la retscha da meds d'instrucziun "mediomatix" ulteriurs meds d'instrucziun da lingua en ils idioms puter, sursilvan, sutsilvan e vallader, ch'èn accordads cun il nov Plan d'instrucziun. Suenter ch'ils meds d'instrucziun per la 2. e 3. classa dal stgalim primar e per la 2. e 3. classa dal stgalim secundar I vegnan gia duvrads en il mintgadi da scola, stattan a disposiziun da nov er ils meds per la 4. classa dal stgalim primar e per la 1. classa dal stgalim secundar I.

Ils novs meds d'instrucziun da lingua analogs e digitals per la scola populara obligatorica en ils idioms puter, sursilvan, sutsilvan e vallader vegnan elavurads da la Scola auta da pedagogia dal Grischun per incumbensa dal chantun Grischun en il rom dal project "mediomatix".

Ovra d'instrucziun cun quatter cudeschs da lavur e cun versiuns electronicas
Analogamain als toms ch'èn gia vegnids edids ils onns precedents, èn ils cuntegns dal med d'instrucziun vegnids elavurads cun agid d'in content management system. Per idiom e per classa consistan quests novs toms da quatter cudeschs da lavur cun mintgamai dus fin trais chapitels. Ils commentaris correspundents per las persunas d'instrucziun na cuntegnan betg mo explicaziuns detagliadas per la concepziun da l'instrucziun, mabain er ideas, descripziuns da projects, soluziuns, models da copiar, lezias e pensums supplementars sco er controllas d'emprender. Els èn disponibels en furma digitala e pon vegnir chargiads giu sco PDFs, sche necessari. Ils cudeschs da lavur stattan a disposiziun tant en furma stampada sco er en furma digitala, sco e‑books. Directamain integradas en las versiuns digitalas èn er las medias necessarias per l'instrucziun, sco chanzuns, texts auditivs e sequenzas da films, che pon uschia vegnir duvradas cun cleras finamiras en l'instrucziun.

Accordads cun il Plan d'instrucziun 21 e cun il mund da las scolaras e dals scolars
Ils novs meds d'instrucziun sa basan sin il Plan d'instrucziun 21. Las incumbensas ch'els cuntegnan han differents grads da difficultad ed èn orientadas a las cumpetenzas. Ellas sa drizzan pia tenor las abilitads ed ils inschigns respectivs sco er tenor la motivaziun da las scolaras e dals scolars. In'attenziun particulara è vegnida dada a las differenzas metodicas, ed en spezial èsi er vegnì guardà che la materia vegnia preparada resguardond la vegliadetgna. Differents access han plinavant l'effect che las scolaras ed ils scolars s'occupan en moda creativa cun ils cuntegns didactics e ch'els vegnan animads da reflectar activamain davart quai ch'els han emprendì. Ils cuntegns reproduceschan il mund da las scolaras e dals scolars. Ultra da quai tractan ils meds d'instrucziun dumondas actualas e resguardan atgnadads regiunalas e culturalas.

Ils meds d'instrucziun dal project "mediomatix" èn vegnids declerads da la Regenza sco meds d'instrucziun da lingua obligatorics per las scolas rumantschas e bilinguas dal chantun Grischun. Els pon vegnir retratgs a partir d'immediat tar ils Meds d'instrucziun dal Grischun. En elavuraziun èn actualmain ils meds d'instrucziun per la 5. e 6. classa. Quels cumpletteschan la retscha da meds d'instrucziun dal project "mediomatix" e duain cumparair per il cumenzament da l'onn da scola 2021/2022.

Fotografias agiuntadas:

Die verschiedenen Lehrmittel sind auf dem Boden ausgebreitet

 

Informaziuns:
- Josy Marie Künzler, Bereichsleiterin Lehrmmanadra dal sectur Meds d'instrucziun, Uffizi per la scola populara ed il sport, tel. +41 81 257 22 61, e‑mail Josy.Kuenzler@avs.gr.ch
- Rico Cathomas, manader dal project "mediomatix", Scola auta da pedagogia dal Grischun, tel. +41 78 625 75 75, e‑mail Rico.Cathomas@phgr.ch


Gremi: Uffizi per la scola populara ed il sport
Funtauna: rg Uffizi per la scola populara ed il sport

Neuer Artikel