Navigaziun principala

Cuntegn da la pagina

Communicaziun da la Regenza dals 10 da settember 2020

  • Erste Mitteilung
  • Neuen Beitrag einfügen
La Regenza ha prendì posiziun tar il sboz d'ina revisiun parziala da l'Ordinaziun federala da chatscha e tar las midadas planisadas da la Lescha federala davart ils supplements da famiglia. Ultra da quai ha ella approvà in project per curreger la via da Sculms.

La Regenza beneventa la revisiun parziala da l'Ordinaziun federala da chatscha

La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC). Il project pertutga la revisiun parziala da l'Ordinaziun federala da chatscha.
Tenor l'avis da la Regenza tegna la revisiun parziala da l'Ordinaziun federala da chatscha quint dal dumber da lufs creschent en Svizra. Ella permetta als chantuns da regular cun responsabladad la populaziun da lufs per impedir donns vi d'animals da niz. Ultra da quai giuditgescha la Regenza sco positiv che er la periclitaziun da l'uman è vegnida fixada sco criteri per la regulaziun. Ultra da quai constatescha ella sin basa da las experientschas fatgas en il chantun Grischun che la sajettada regulatorica da lufs pitschens d'in triep saja a lunga vista l'unica mesira effectiva per spaventar lufs respectivamain trieps da lufs. Ord vista da la Regenza na sto la populaziun d'animals selvadis betg vegnir regulada mo tar ils tschiervs, ils chamutschs ed ils portgs selvadis sco er tar ils chamutschs ed ils capricorns, mabain er – sche necessari – tar ils lufs.

Agiunta a la posiziun

Consultaziuns dal Departament federal per ambient, traffic, energia e communicaziun

La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC).

La Regenza ha approvà la midada da la Lescha federala davart ils supplements da famiglia planisada da la Confederaziun

La Regenza ha prendì posiziun tar in project da consultaziun dal Departament federal da l'intern. Las midadas planisadas en la Lescha federala davart ils supplements da famiglia concernan d'ina vart l'introducziun d'ina gulivaziun cumplaina da las grevezzas e da l'autra vart la schliaziun dal fond per ils supplements da famiglia en l'agricultura.
La Regenza beneventa las midadas proponidas da la lescha federala e sustegna tant l'introducziun d'ina gulivaziun cumplaina da las grevezzas sco er la schliaziun dal fond per ils supplements da famiglia en l'agricultura. Ina gulivaziun cumplaina da las grevezzas stgaffescha las medemas premissas per tut las patrunas ed ils patruns e per tut las persunas cun activitad da gudogn independenta. Ultra da quai è ella sa cumprovada fitg bain en quels chantuns ch'enconuschan gia oz ina gulivaziun cumplaina da las grevezzas. Er administrativamain po ella vegnir realisada facilmain dals chantuns. Pervia da quai èsi per la Regenza gist da surlaschar als chantuns la cumpetenza per concepir concretamain la gulivaziun cumplaina da las grevezzas. La schliaziun dal fond per ils supplements da famiglia en l'agricultura n'ha tenor l'avis da la Regenza naginas consequenzas per las retschavidras ed ils retschaviders da prestaziuns e simplifitgescha ils currents da pajament tranter la Confederaziun ed ils chantuns per finanziar ils supplements da famiglia en l'agricultura. Pervia da quai sustegna ella la schliaziun dal fond sco er las modalitads da pajament als chantuns.

Consultaziuns dal Departament federal da l'intern

La Regenza ha prendì posiziun tar in project da consultaziun dal Departament federal da l'intern.

Glisch verda per la correcziun da la via da Sculms

La Regenza ha approvà il project per la correcziun da la via da Sculms, che maina sco unica colliaziun da via si a Sculms, vischnanca da Val Stussavgia. En il rom dal project duai il traject da via da Fapiogn fin al sectur Sigl Ault tar il spartavias Scardanal vegnir adattà a las pretensiuns che valan ozendi. Tranter auter duai per quest intent vegnir schlargiada la via a 4,2 meters, vegnir renovadas la surstructura e la cuvrida da la via sco er optimads l'allontanament da l'aua, la geometria da la via, ils access da las vias d'agricultura e da guaud existentas ed il nuf Sigl Ault. Tut en tut custa il project circa 4,8 milliuns francs.

Sculmserstrasse mit Rissen vor einer Kurve
Neuer Artikel
Gremi: Regenza
Funtauna: rg Chanzlia chantunala dal Grischun