Navigaziun principala

Cuntegn da la pagina

Lantschà in program da prevenziun dal cancer da la beglia per il Grischun

  • Erste Mitteilung
  • Neuen Beitrag einfügen

Il nov program "Prevenziun dal cancer da la beglia Grischun" è pront. La Lia grischuna cunter il cancer realisescha il program da prevenziun per incumbensa da l'Uffizi da sanadad dal Grischun. 

Cancer da la beglia è la malsogna da cancer la segund frequenta tar las dunnas e la terz frequenta tar ils umens. Grazia a controllas preventivas po cancer da la beglia vegnir impedì effectivamain. Sche cancer da la beglia è gia avant maun e vegn diagnostitgà a temp, èn las schanzas da guariziun grondas. La diagnosa tempriva da cancer da la beglia è – ord vista scientifica – incontestadamain effectiva. Ina prevenziun regulara è perquai impurtanta e po salvar vita. L'Uffizi da sanadad dal Grischun ha incumbensà la Lia grischuna cunter il cancer da realisar in program sistematic da prevenziun dal cancer da la beglia. Ella garantescha ultra da quai la direcziun organisatorica e medicinala dal program. La finamira da la "Prevenziun dal cancer da la beglia Grischun" è quella d'infurmar la populaziun davart il tema cancer da la beglia, da la sensibilisar per il tema e da la motivar per ina prevenziun activa. Grazia ad ina prevenziun activa pon a pli lunga vista vegnir reducids ils custs da sanadad.

Il program "Prevenziun dal cancer da la beglia Grischun"
La ristga da survegnir cancer da la beglia crescha a partir dal 50avel onn da vita. Il program da prevenziun sa drizza perquai a la populaziun dal Grischun tranter 50 e 69 onns. Per la controlla preventiva datti duas metodas fidadas: Il test davart sang en il passacorp (FIT), che vegn repetì mintga 2 onns e la coloscopia che vegn repetida mintga 10 onns. L'assicuranza obligatorica per la tgira da persunas malsaunas surpiglia ils custs per la controlla preventiva da las dunnas e dals umens tranter 50 e 69 onns. Sche la controlla ha lieu en il rom dal program, èn questas prestaziuns deliberadas da la franschisa.

Tut las annadas da la gruppa en mira dastgan sa laschar integrar cun liber access en il program. Supplementarmain vegnan mintga onn contactadas persunalmain e motivadas trais annadas da la gruppa en mira. L'integraziun en il program vegn fatga da la media u dal medi da chasa, sur l'apoteca, sur la pratica da gastroenterologia, tar la ginecologa u tar il ginecolog, sur la Lia grischuna cunter il cancer u sur la pagina d'internet www.vorsorge-gr.ch. Il program è pront e cumenza il 1. d'october 2020.

Strategia naziunala cunter cancer
Il program da prevenziun dal cancer da la beglia fa part da la Strategia naziunala cunter cancer. La finamira da la strategia è quella da coordinar sin plaun naziunal projects ed activitads en la prevenziun, en la diagnostica, en la terapia ed en la reabilitaziun da cancer e da stgaffir egualitad da las schanzas. Ultra dal gudogn per las persunas pertutgadas è il program da prevenziun dal cancer da la beglia impurtant e raschunaivel per l'economia publica: Ils proxims decennis stoi vegnir fatg quint cun in augment da malsognas da cancer per motivs demografics. A medem temp dastgassan resultar – grazia al svilup en la perscrutaziun da cancer – novas opziuns per tractar la malsogna. Grazia a la prevenziun regulara vegnan registradas main malsognas da cancer, quai che fraina l'augment dals custs da sanadad.

Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch
- Irina Casaulta, direcziun organisatorica dal program "Prevenziun dal cancer da la beglia Grischun", tel. +41 81 300 50 81, e‑mail Irina.Casaulta@vorsorge-gr.ch
- Gianfranco Zala, direcziun medicinala dal program "Prevenziun dal cancer da la beglia Grischun",  tel. +41 81 300 50 82, e‑mail Gianfranco.Zala@vorsorge-gr.ch


Gremi: Departament da giustia, segirezza e sanadad
Funtauna: Uffizi da sanadad

Neuer Artikel