Navigaziun principala

Cuntegn da la pagina

La Regenza ha deliberà la revisiun parziala da la Lescha davart la protecziun civila dal chantun Grischun

  • Erste Mitteilung
  • Neuen Beitrag einfügen

La Regenza ha deliberà – per mauns dal Cussegl grond – il sboz per ina revisiun parziala da la Lescha davart la protecziun civila dal chantun Grischun (Lescha da protecziun civila). En il Grischun duai l'obligaziun da far servetsch da protecziun civila vegnir prolungada fin 5 onns suenter l'entrada en vigur da la lescha federala revedida. Quai permetta al chantun d'instradar ina reorganisaziun adequata da la protecziun civila chantunala e da prender per mauns las midadas da leschas respectivas.

Ils 20 da december 2019 han las chombras federalas deliberà la revisiun totala da la Lescha federala davart la protecziun da la populaziun e la protecziun civila. La revisiun totala che duai entrar en vigur il 1. da schaner 2021 ha effects considerabels sin il dumber dals appartegnents da la protecziun civila (AdPC). Il dumber dad actualmain tut en tut 2277 AdPC (senza voluntaris) sa reduciss per il 1. da schaner 2021 per 624 AdPC a 1653 AdPC.

Prolungaziun limitada da l'obligaziun da far servetsch da protecziun civila
Questa reducziun dad AdPC chaschuna ina mancanza considerabla da spezialistas e spezialists sco er da persunas dal cader. En l'avegnir ston pervia da quai vegnir reducidas considerablamain u schizunt stritgadas bleras prestaziuns respectivamain acziuns a favur da las vischnancas u a favur da la cuminanza. Pervia da la reducziun stessan a disposiziun er bler main AdPC per cas d'urgenza, sco per exempel a Bondo u per dumagnar la pandemia da COVID-19. La capacitad d'intervenziun da la protecziun civila e la finala er da las instituziuns e da las autoritads che profitan da l'engaschament da la protecziun civila vegniss pia fitg restrenschida.

Perquai sto vegnir chattada ina soluziun per il chantun Grischun. La Lescha federala davart la protecziun da la populaziun e la protecziun civila revedida prevesa da prolungar l'obligaziun da far servetsch da protecziun civila per in temp limità. La Regenza propona da far diever da questa pussaivladad per pudair adattar la Protecziun civila dal Grischun a questa nova situaziun da partenza e per pudair elavurar las midadas da leschas respectivas.

En la consultaziun ha il project da la revisiun parziala da la Lescha davart la protecziun civila dal chantun Grischun chattà dapertut in'acceptanza positiva. La midada proponida per la Lescha da protecziun civila è stada incontestada. Ella vegn tractada durant la sessiun da december 2020.


Agiunta:
missiva


Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
- Martin Bühler, manader da l'Uffizi da militar e da protecziun civila, tel. +41 81 257 35 22, e-mail Martin.Buehler@amz.gr.ch


Gremi: Regenza
Funtauna: rg Departament da giustia, segirezza e sanadad

Neuer Artikel