Navigation

Inhaltsbereich

  • Erste Mitteilung
  • Neuen Beitrag einfügen

La Cumissiun dal cussegl grond per economia e taxas (CET) ha predeliberà la missiva da la Regenza tar la revisiun parziala da la Lescha da taglia per il chantun Grischun. Unicamain l'imposiziun da taglia sin cumpensaziuns en chapital or dal provediment ha chaschunà discussiuns.

La CET ha predeliberà la missiva da la Regenza tar la revisiun parziala da la Lescha da taglia per il chantun Grischun a chaschun d'ina sesida d'in mez di sut il presidi da la presidenta da la cumissiun Carmelia Maissen. A la sesida èn er sa participads il president da la Regenza Christian Rathgeb sco er ina represchentanza da l'Administraziun da taglia. Il basegn per la revisiun parziala da la Lescha da taglia è stà incontestà; la cumissiun recumonda unanimamain al Cussegl grond d'entrar en il project.

Las adattaziuns areguard la taglia a la funtauna èn stadas incontestadas – en l'avegnir duai esser pussaivel d'inoltrar la decleraziun da taglia senza suttascripziun
La part principala dal project pertutga adattaziuns tar la taglia a la funtauna che sto vegnir armonisada cun il dretg federal per il 1. da schaner 2021. Perquai ch'i na dat nagin spazi d'agir sin plaun chantunal, èn quests puncts stads – sco spetgà – incontestads en la cumissiun. Il medem vala per la realisaziun d'ina incumbensa da la fracziun da la PPS che pretenda da digitalisar cumplettamain la decleraziun da taglia, ed uschia er da renunziar a la suttascripziun d'agen maun.

Differenzas tar la taglia speziala sin prestaziuns da chapital
La Regenza ha er profità da la missiva actuala per realisar ina incumbensa da la fracziun da la PLD concernent ina taglia speziala sin prestaziuns da chapital dal provediment ch'il Cussegl grond aveva acceptà en la sessiun d'avust 2018 en ina furma pli moderada. L'entira cumissiun è stada d'accord ch'i na duai vegnir fatga pli nagina differenziaziun tranter pajataglias maridads e betg maridads e che la medema tariffa minimala e maximala duai pia valair per tuts. Sco tariffa minimala ha la cumissiun proponì 1,5 pertschient. Areguard la tariffa maximala hai dà differentas opiniuns: La maioritad da la cumissiun vesess quella tar 2 pertschient, per occupar ina plazza a la testa en cumparegliaziun cun auters chantuns. Per in'emprima minoritad bastass ina reducziun a 2,6 pertschient per esser cumpetitiv sin plaun interchantunal, entant ch'ina segunda minoritad ha proponì 4 pertschient, perquai ch'ella refusa perditas da taglia e la favurisaziun da grondas retratgas. La proposta da la Regenza da fixar la tariffa maximala a 3 pertschient, n'ha chattà nagin sustegn.

La reducziun da la chareschia na vegn betg resguardada
Beneventà fermamain ha la cumissiun la proposta da la Regenza da betg resguardar il curs da chareschia negativ cumpareglià cun l'onn precedent e da far naginas adattaziuns sin donn e cust dals pajataglias, per exempel tras deducziuns reducidas per uffants u per premias da las cassas da malsauns. Deducziuns pli pitschnas pervia d'ina chareschia pli bassa cumpareglià cun ils onns precedents chaschunassan taglias pli autas, quai che na fiss betg chapaivel en vista a la situaziun actuala da la pandemia da COVID-19 ed en vista a sias consequenzas.

Il Cussegl grond vegn a tractar il project en la sessiun d'october 2020.


Infurmaziuns:
presidenta da la cumissiun Carmelia Maissen, tel. +41 79 713 90 27


Gremi: Cumissiun per politica da stadi e strategia
Funtauna: rg Cumissiun per politica da stadi e strategia

Neuer Artikel