Trais minutas per persuna testada, nagins temps da spetga ed avunda material medicinal: La seria da tests da corona cun las deputadas ed ils deputads sco er cun ils cussegliers guvernativs en il Center da congress a Tavau ha pudì vegnir realisada la mesemna en damaun senza problems. Er l'interess per ils tests territorials en il Grischun dal Sid è grond. Fin ussa èn s'annunziadas passa 6000 persunas per quests tests.
La seria da tests da corona en il rom da la sessiun da december dal Cussegl grond ha valì sco preparaziun per ils tests territorials en il Grischun dal Sid. Repartids sin quatter lingias da test èn ils tests da las 108 commembras e commembers dal Cussegl grond vegnids fatgs tranter las 09.30 e las 12.00. Grazia a las preannunzias han ins pudì stimar bain, quantas persunas che sa preschentian per il test e tge optimaziuns che stoppian vegnir fatgas tar ils andaments e tar la plattafurma da registraziun.
Fullas da glieud n'hai mai dà a Tavau. In local da spetga è stà a disposiziun. Grazia a marcaziuns giu per terra èn vegnidas observadas las distanzas. Ils tests dastgan vegnir valitads sco signal expressiv per la populaziun. Avant las politicras ed ils politichers èn er vegnids testads sportistas e sportists da la Russia, da l'America e da la Tschechia. Er la seria da tests da PCR è stada in success, malgrà temps da spetga pli lungs.
Grond interess per ils tests territorials
Dapi la mesemna en damaun pon s'annunziar er las abitantas ed ils abitants da las 18 vischnancas da las vals grischunas dal sid per ils tests territorials. Per quests tests territorials en las regiuns Bernina, Engiadina Bassa/Val Müstair e Malögia è avant maun in grond interess. Dapi la mesemna en damaun èn s'annunziadas 6000 persunas per in test (stadi: gievgia, a las 08.00).
En cumbinaziun cun la campagna da communicaziun, ch'è vegnida lantschada a medem temp, è la plattafurma d'annunzia vegnida visitada en moda surproporziunala, quai che ha chaschunà ina instabilitad temporara. Las capacitads èn vegnidas extendidas immediatamain; dapi lura funcziuna l'annunzia senza difficultads.
Ils tests territorials dal Grischun èn in project da pilot. La fin d'emna dals 11 fin ils 13 da december pon las abitantas ed ils abitants sco er ils giasts da las vals grischunas dal sid sa laschar testar voluntarmain e gratuitamain en 23 lieus. D'ina vart duai il project da pilot preschentar in maletg da la derasaziun da COVID-19 entaifer la populaziun, da l'autra vart furnescha el enconuschientschas impurtantas areguard la logistica, la tecnica ed ils andaments per strategias da test da grondas dimensiuns.
En cas da dumondas davart l'annunzia per ils tests pon ins sa drizzar a la hotline chantunala "Post da communicaziun per il coronavirus". Quella è occupada ad interim durant in temp prolungà fin dumengia, mintga di da las 8.00 fin las 18.00.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch,
tel. +41 79 716 22 95 (exclusivamain per collavuraturas e collavuraturs da las medias)
Gremi: Uffizi da sanadad
Funtauna: rg Uffizi da sanadad