Navigaziun principala

Cuntegn da la pagina

Il chantun sustegna ina stagiun d'enviern segira e prosperaivla

  • Erste Mitteilung
  • Neuen Beitrag einfügen

La Regenza ha concedì a Grischun Vacanzas ina contribuziun speziala dad 850 000 francs per realisar ina campagna d'enviern. Il Departament d'economia publica e fatgs socials ha ultra da quai empermess contribuziuns da promoziun per garantir ina stagiun d'enviern segira.

La pandemia dal coronavirus resta ina fitg gronda sfida per ils acturs dal sectur da turissem en il Grischun. Per mitigiar las consequenzas economicas ha la Regenza prendì mesiras a favur dal turissem. Grischun Vacanzas ha elavurà in ulteriur pachet da mesiras per stimular la dumonda turistica, cun l'intent d'obtegnair giasts svizzers l'enviern 2020/2021. La Regenza ha concedì a Grischun Vacanzas ina contribuziun speziala dad 850 000 francs per sustegnair questa campagna da communicaziun.

Las mesiras da communicaziun han la finamira da motivar las Svizras ed ils Svizzers, che fan normalmain vacanzas durant il temp d'enviern en regiuns pli chaudas a l'exteriur, da vegnir en il Grischun. La campagna sa serva en spezial da chanals online e renda attent, ch'i dettia bler sulegl ed avunda plazza en il Grischun. Las circumstanzas spezialas vegnan pia resguardadas er vinavant.

Reservaziun digitala da maisas
Plinavant sustegna il Departament d'economia publica e fatgs socials la purschida da la federaziun GastroGrischun cun ina contribuziun unica da 294 000 francs. GastroGrischun porscha a ses commembers dus sistems digitals per reservar maisas, che permettan d'identifitgar ils giasts sco er da controllar meglier la limitaziun da plazzas pervia da COVID en la gastronomia. Ils giasts survegnan uschia dapli confort e las gestiunarias ed ils gestiunaris d'in manaschi da gastronomia ina facilitaziun administrativa.

Occurrenzas da sensibilisaziun per acturs turistics
Ultra da quai vegn la Cuminanza d'interess per il turissem en il Grischun incumbensada d'organisar ensemen cun l'Uffizi da sanadad e cun GastroGrischun il cumenzament da november 10 occurrenzas da sensibilisaziun en differents lieus turistics dal Grischun. La finamira è quella da gidar a preparar en moda optimala las acturas ed ils acturs turistics per la proxima stagiun d'enviern: observar ils concepts da protecziun, cussegls e barat d'experientschas concernent la realisaziun, ma er proceder, sch'i dat cas da suspect tar giasts sco er tar collavuraturas e collavuraturs. A medem temp vegnan er preschentads ils dus sistems digitals per reservar maisas.

Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch


Gremi: Departament d'economia publica e fatgs socials
Funtauna: rg Departament d'economia publica e fatgs socials

Neuer Artikel