La via dal Güglia è ina part integrala da l'axa nord/sid da la rait naziunala da vias principalas. Sco via da transit d'impurtanza naziunala serva ella tranter auter a l'avertura da la regiun turistica Lai-Valbella.
La Regenza ha ussa approvà in project per la correcziun da la via dal Güglia sin il traject Gross Kehr – Kapellakehren, nua ch'il vial è fitg stretg e nunsurvesaivel. Las relaziuns da spazi fitg stretgas chaschunan impediments da traffic considerabels durant l'enviern u en cas da bler traffic. Ultra da quai traversa la via dal Güglia, sin il traject Gross Kehr – Malix, zonas activas da la spunda da bovas "Erlenrutsch". Ella è correspundentamain exponida a defurmaziuns permanentas. Perquai che la cuvrida da la via n'è betg resistenta a la schelira sco er pervia da sbuvadas è il stadi architectonic da la via dal Güglia insuffizient. En il rom dal project duai il vial vegnir schlargià a 6,5 meters. Ultra da quai duai vegnir disponì in vial da velo en direcziun dal pass, renovada la surstructura, curregida minimalmain la geometria da la via sco er construì da nov il sistem da conducts d'aua da plievgia e da naiv e pia augmentada la segirezza stradala. Ils custs totals importan 16,7 milliuns francs.
A medem temp ha la Regenza approvà in project da la citad da Cuira per construir duas fermadas da bus tenor ils basegns da las persunas cun impediments, che vegn realisà ensemen cun la correcziun da la via dal Güglia. Quai èn las fermadas da bus Städeli en tuttas duas direcziuns. La Regenza ha concedì ina contribuziun chantunala da 57 000 francs per quest intent.

 

La Regenza ha approvà in project per la correcziun da la via dal Scanvetg. Quella fa part da la rait chantunala da vias da colliaziun e dat – sco unica colliaziun da via – access a la vischnanca d'Arosa. L'entir traffic en la val autalpina dal Scanvetg circulescha sin questa via.
Pervia dal nausch stadi da la surstructura e da la geometria da la via sto la via dal Scanvetg vegnir renovada sin il traject da la punt sur l'aual da Sapün tranter Langwies ed il passadi Rongegg. En il rom dal project duai la via tranter auter vegnir schlargiada a 6 meters, la surstructura sco er la cuvrida da la via duain vegnir remplazzadas, l'allontanament da l'aua duai vegnir meglierà ed ils access duain vegnir optimads. Pervia da differents donns ston plinavant vegnir renovads la punt sur l'aual da Sapün ed il passadi Rongegg. Tut en tut custa il project circa 8 milliuns francs.

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 29 da november 2020:

• Iniziativa dal pievel dals 10 d'october 2016 "Per interpresas responsablas – per proteger ils umans e l'ambient" (Fegl uffizial federal 2020 5505); ed
• Iniziativa dal pievel dals 21 da zercladur 2018 "Per in scumond da finanziar ils producents da material da guerra" (Fegl uffizial federal 2020 5509).

Sin plaun chantunal n'èn previs nagins projects da votaziun per ils 29 da november 2020.