Sin fundament dal dumber da cas che crescha svelt en il chantun Grischun, è il Stab directiv chantunal (SDC) pront da far ulteriuras acziuns. Perquai che l'occupaziun dals ospitals è actualmain anc bassa en il chantun Grischun, stat il SDC a disposiziun a l'Uffizi da sanadad ed al sustegna. Sin basa da las enconuschientschas cun COVID‑19 da questa primavaira èn ils ospitals sa preparads per in augment da las assegnaziuns.
In dumber fermamain creschent da persunas dal Grischun è en quarantina respectivamain en isolaziun. Il basegn d'infurmaziun da vart da la populaziun, da vart da las instituziuns e da vart da las vischnancas è s'augmentà fermamain sin basa da las novas prescripziuns da la Confederaziun. L'Uffizi da sanadad ha pia engrondì il post da communicaziun per il coronavirus dal chantun Grischun. Infurmaziuns detagliadas davart la quarantina, davart l'isolaziun e davart las mesiras vertentas sco er davart las uras da manaschi da la infoline stattan a disposiziun sin la pagina d'internet da corona dal chantun sut www.gr.ch/coronavirus.
L'evaluaziun dal dumber da cas da fin ussa ha mussà che 30 pertschient da las persunas ch'èn en isolaziun derivan da la quarantina en il Grischun. Quai metta en evidenza l'impurtanza dal contact tracing. Quest servetsch vegn augmentà permanentamain cun persunal scolà da l'administraziun e d'appartegnents da la protecziun civila, pervia dal dumber da cas creschent.
Il SDC è pront per in lung temp d'acziun
Cun il sustegn dal SDC valitescha l'Uffizi da sanadad permanentamain la situaziun. Il SDC sustegna l'Uffizi da sanadad en quels secturs che surpassan ils champs d'activitad sco tals da l'Uffizi da sanadad e fa ina planisaziun da prevenziun.
La structura e la moda da lavurar dal SDC èn adattadas per dumagnar la situaziun actuala cumplexa. Ils acturs en l'administraziun, tar las vischnancas e tar la Confederaziun vegnan integrads en moda structurada e coordinada. Il SDC po profitar da sias experientschas da questa primavaira. Sin basa dal probablamain lung temp d'acziun è la structura che valeva durant questa primavaira en ils uffizis pertutgads, vegnida rinforzada generalmain: La direcziun dal SDC han il cumandant da la Polizia chantunala Walter Schlegel ed il manader da l'Uffizi da militar e da protecziun civila, Martin Bühler.
Infurmaziuns:
post da communicaziun per il coronavirus dal chantun Grischun, e‑mail kfsmedien@amz.gr.ch, tel +41 79 716 22 95 exclusivamain per collavuraturas e collavuraturs da las medias)
Gremi: Uffizi da sanadad
Funtauna: rg Departament da giustia, segirezza e sanadad