Navigation

Inhaltsbereich

  • Erste Mitteilung
  • Neuen Beitrag einfügen

La revisiun parziala da la Lescha d'energia dal chantun Grischun, ch'era vegnida concludida en la sessiun da favrer 2020, entra en vigur il 1. da schaner 2021.

Cun il conclus dals 12 da favrer 2020 ha il Cussegl grond approvà la revisiun parziala da la Lescha d'energia dal chantun Grischun (LEG). Il termin da referendum facultativ è scadì ils 19 da matg 2020. Entaifer quest termin n'èn vegnids inoltrads nagins referendums.

Revisiun parziala da la Lescha chantunala d'energia
La revisiun parziala da la LEG cumpiglia in'adattaziun al stadi da la tecnica en il sectur dals edifizis cun modifitgar il Model vertent da prescripziuns energeticas dals chantuns (MoPEC 2014), e quai resguardond las relaziuns en il Grischun. Ils puncts centrals èn novas reglas per remplazzar produciders da chalur sco er l'obligaziun da producir atgna electricitad en edifizis novs.

Revisiun totala da l'Ordinaziun d'energia dal chantun Grischun
Ultra da quai ha la Regenza relaschà l'Ordinaziun d'energia dal chantun Grischun (OEG). Quella regla en spezial ils detagls da l'adattaziun al stadi da la tecnica e las cundiziuns da promoziun per la construcziun d'implants fotovoltaics vid edifizis ed infrastructuras. Grazia a l'ultima mesira duai vegnir prestada particularmain ina contribuziun per cuvrir la largia d'electricitad durant l'enviern en il chantun Grischun.

Ulteriuras infurmaziuns chattais Vus en l'Ordinaziun d'energia dal chantun Grischun e sin www.energienachweis.gr.ch.

Introducziun dal sistem da la controlla privata
Plinavant ha la Regenza concludì da sa participar a la Cunvegna interchantunala davart l'execuziun da las controllas privatas en il sectur d'energia sco er a la cunvegna supplementara. La controlla privata cumpiglia ils secturs spezials ch'èn relevants per l'energia Isolaziun termica, Stgaudaments, Indrizs da climatisaziun e da ventilaziun sco er Illuminaziun. La controlla privata duai esser in agid per las vischnancas grischunas per examinar, sche las pretensiuns architectonicas envers in'utilisaziun spargnusa e raziunala da l'energia vegnian observadas. Las vischnancas grischunas èn libras d'admetter quest sistem en il rom da la procedura per la permissiun da construcziun u betg.

Pussaivladad da far dapli deducziuns tar la taglia chantunala
A partir da la perioda fiscala 2021 pon tut las investiziuns che servan a spargnar energia u a proteger l'ambient pudair vegnir deducidas da la taglia chantunala, e quai sut las medemas premissas sco tar la taglia federala directa. Plinavant han ils custs da renatiralisaziun – en vista a la construcziun d'in edifizi cumpensatoric – a partir da la perioda fiscala 2021 il medem status sco ils custs da mantegniment e pon perquai vegnir deducids.


Infurmaziuns: 
Davart la Lescha d'energia e l'Ordinaziun d'energia:
Andrea Lötscher, manader da la partiziun Effizienza da l'energia, Uffizi d'energia e da traffic, tel. +41 81 257 36 30, e-mail Andrea.Loetscher@aev.gr.ch 

Davart las midadas en la Lescha da taglia:
Toni Hess, manader dal Servetsch giuridic tar l'Administraziun da taglia, tel. +41 81 257 33 26, e-mail Toni.Hess@stv.gr.ch


Gremi: Regenza
Funtauna: rg Chanzlia chantunala dal Grischun

Neuer Artikel