Navigaziun principala

Cuntegn da la pagina

Rapport da la cumissaria da la Regenza per la vischnanca da Roveredo

  • Erste Mitteilung
  • Neuen Beitrag einfügen

La Regenza ha prendì enconuschientscha dal rapport da la cumissaria da la Regenza per la vischnanca da Roveredo. Il sustegn sin basa dal dretg da surveglianza è sa mussà sco cunvegnent. Per entant na dovri naginas ulteriuras mesiras chantunalas. La Regenza appellescha a la responsabladad da las autoritads ed ad ina collavuraziun colleghiala en l'interess da la populaziun.

En ses rapport constatescha la cumissaria da la Regenza che la situaziun politica en la vischnanca da Roveredo saja sa calmada, ma ch'ella saja dentant anc adina instabila e fragila. Er l'impressiun d'ina vischnanca dividida na possia betg vegnir snegada. Mesiras immediatas n'èn actualmain betg necessarias tenor l'avis da la cumissaria da la Regenza.

Raschuns ed incarica
Cun il conclus dals 15 da zercladur 2020 ha la Regenza nominà dunna Anna Giacometti, anteriura presidenta communala da la vischnanca da Bregaglia, sco cumissaria da la Regenza per la vischnanca da Roveredo. Las raschuns per questa mesira da sustegn sin basa dal dretg da surveglianza eran la relaziun delicata entaifer la suprastanza communala, las divergenzas tranter la suprastanza e la cumissiun da gestiun communala sco er la situaziun entaifer l'administraziun communala pervia da midadas da persunal. Il stadi engrevgiant era vegnì influenzà decisivamain er tras il fatg ch'il resultat definitiv da las elecziuns da la suprastanza communala per la perioda d'uffizi 2019-2022 è stà cler pir tras la sentenzia da la Dretgira administrativa dals 4 da zercladur 2020, suenter lungas e stentusas proceduras da meds legals. La cumissaria da la Regenza ha gì l'incarica da gidar la vischnanca da dumagnar sia crisa instituziunala actuala. Il mandat era terminà fin la fin da settember 2020.

Effects e mesiras communalas
Dapi la sentenzia legalmain valaivla da la Dretgira administrativa dals 4 da zercladur 2020 ha la suprastanza pudì prender conclus en sia cumposiziun ordinaria. La relaziun tranter la suprastanza e la cumissiun da gestiun è apparentamain sa meglierada. La vischnanca ha pudì engaschar interimisticamain in chanzlist communal e spera da pudair occupar il proxim temp definitivamain questa posiziun centrala, quai che dastgass avair effects positivs sin l'activitad administrativa. La suprastanza communala è londervi d'examinar minuziusamain las structuras communalas en general e la procedura electorala en spezial. Ella ha nominà ina gruppa da lavur che ha cumenzà cun las lavurs en il sectur da la legislaziun instituziunala.

Appel da la Regenza
Cun satisfacziun ha la Regenza prendì enconuschientscha dal rapport da la cumissaria da la Regenza. Ella constatescha che la suprastanza communala è en il fratemp cumpletta ed occupada en moda legitima e ch'ella po ademplir sias incumbensas. La Regenza è da l'avis ch'i saja cunvegnent da dar a la vischnanca respectivamain a sias autoritads la pussaivladad da puspè procurar en moda cumplainamain autonoma per las atgnas fatschentas. Ina mesira da surveglianza na vegn perquai betg prolungada respectivamain ordinada immediatamain. En quest lieu appellescha la Regenza dentant instantamain a las commembras ed als commembers da las autoritads da Roveredo da s'engaschar en l'interess da la populaziun per ina collavuraziun positiva e colleghiala e da betg far dispitas persunalas entaifer las autoritads.


Infurmaziuns:
- dr. Christian Rathgeb, president da la Regenza, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Thomas Kollegger, manader da l'Uffizi da vischnancas, tel. +41 81 257 23 81, e-mail Thomas.Kollegger@afg.gr.ch


Gremi: Regenza
Funtauna: rg Uffizi da vischnancas

Neuer Artikel