Navigation

Inhaltsbereich

  • Erste Mitteilung
  • Neuen Beitrag einfügen

La Regenza ha introducì l'obligaziun da purtar ina mascrina per las scolaras ed ils scolars dal stgalim secundar I. Quella cumenza glindesdi, ils 9 da november 2020, e vala per entant fin mardi, ils 22 da december 2020.

Il sectur da furmaziun ha la finamira suprema da garantir l'incumbensa d'educaziun e da furmaziun per tut las scolaras e tut ils scolars en il chantun Grischun. Quai gartegia il meglier, sch'il manaschi da scola po avair lieu cun l'instrucziun da preschientscha.

Extensiun da l'obligaziun da purtar ina mascrina
La situaziun epidemiologica critica actuala sa mussa er en il sectur da la scola populara. Dapi las vacanzas d'atun hai puspè dà dapli cas da COVID-19 en las scolas grischunas. Per che las scolaras ed ils scolars possian vegnir instruids vinavant en scola, ha la Regenza relaschà las suandantas mesiras da protecziun supplementaras:

En las scolas popularas publicas e privatas incl. instituziuns da la scolaziun speziala en il chantun Grischun vala a partir da glindesdi, ils 9 da november 2020, per tut las scolaras e tut ils scolars dal stgalim secundar I sco er per lur persunas d'instrucziun l'obligaziun generala da purtar ina mascrina sin l'areal da scola (incl. secturs d'abitar da las instituziuns da la scolaziun speziala).

Sur lur medias e medis d'instituziun pon las instituziuns da la scolaziun speziala fixar – en cunvegnientscha cun la media chantunala – excepziuns motivadas da l'obligaziun da purtar ina mascrina.

La nova regulaziun vegn relaschada en cumplettaziun dal conclus da la Regenza dals 15 d'october 2020 e vala per entant fin mardi, ils 22 da december 2020, pia fin las vacanzas da Nadal.

Garanzia da l'instrucziun da preschientscha
L'extensiun da l'obligaziun da purtar ina mascrina sin il stgalim secundar I è in pass rigurus. Quest pass è dentant necessari per franar l'epidemia. Grazia a questa mesira da protecziun poi plinavant vegnir evità ch'entiras classas da scola ston vegnir messas en quarantina ed instruidas sin distanza, sch'i dat singuls cas positivs.


Infurmaziuns:
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 02, e-mail Jondomenic.Parolini@ekud.gr.ch


Gremi: Regenza
Funtauna: rg Regenza

Neuer Artikel