Navigaziun principala

Cuntegn da la pagina

Sin via virtuala tras il nov edifizi administrativ "sinergia"

  • Erste Mitteilung
  • Neuen Beitrag einfügen

Il bindel è taglià: oz en damaun han ils cussegliers guvernativs Mario Cavigelli e Marcus Caduff dà l'avertura uffiziala al nov edifizi administrativ "sinergia" a Cuira. A partir d'immediat ha la populaziun la pussaivladad d'explorar l'edifizi sin via virtuala. In video interactiv da 360 grads accumpogna burgaisas e burgais interessads tras ils novs locals administrativs.

Cun in ritg program per il "di da las portas avertas" avess il center administrativ "sinergia" stuì survegnir in'avertura festiva. Ils patruns da construcziun e tut las persunas ed interpresas participadas a la construcziun eran gia sa legrads da dastgar preschentar persunalmain l'ovra a la populaziun. Ma la pandemia dal coronavirus dumogna anc adina fermamain il mintgadi. Quai impedescha d'organisar ina tala occurrenza.

Explorar la "sinergia" sin via virtuala
Per tuttina pussibilitar a la populaziun ina invista da l'edifizi nov fitg funcziunal, ha l'Uffizi da construcziun auta realisà entaifer curt temp – sco alternativa ad ina visita persunala – in'aventura interactiva da 360 grads. Il video accumpogna las aspectaturas ed ils aspectaturs tranter auter tras ils novs biros open-space, tras las stanzas da sesida, tras il restaurant, tras la sala da spetga u tras il labor. Vuschs simpaticas mainan en tut las linguas chantunalas tras las localitads e dattan interessantas infurmaziuns cumplementaras davart las furmas da lavur, davart ils standards dals locals, davart l'effizienza energetica u davart l'art a l'edifizi. Il video stat a disposiziun sin la pagina d'internet e sin il chanal da Youtube dal chantun Grischun.

Neuer Artikel

 

Profitar da sinergias a favur da la populaziun
Cun il nov center administrativ è terminada la pli nova etappa da la strategia chantunala d'immobiglias. En l'entir chantun duain vegnir manads en l'avegnir tut en tut nov centers administrativs. A Glion, Roveredo, Tusaun, Tavau, Scuol, Landquart ed ussa a Cuira èn quels gia en funcziun. A Samedan ed a Poschiavo duain suandar ulteriurs centers administrativs. L'administraziun chantunala sa concentrescha uschia pli e pli en la chapitala ed en ils lieus regiunals principals. Per las abitantas ed ils abitants è ella reunida en in lieu ed è pli facila da chattar. Quai rinforza plinavant la percepziun da las collavuraturas e dals collavuraturs da dastgar lavurar cuminaivlamain a favur da nossa populaziun. Uschia èsi pussaivel da trair a niz meglier las sinergias, d'optimar ils process e da spargnar custs currents.

Certificats da persistenza la renconuschan spezialmain
Il nov center administrativ sa chatta en in edifizi planisà digitalmain, zunt effizient areguard l'energia e fitg persistent, ch'è vegnì certifitgà gist trais giadas. Per l'ina è el l'edifizi il pli grond da la Svizra orientala che ademplescha il standard "Minergie-P-Eco". El surpassa schizunt cleramain las pretensiuns. En il sectur da la persistenza cumplessiva al conceda la rait Construcziun duraivla Svizra (NNBS) ultra da quai il certificat "SNBS 2.0 Edifizi aut – Administraziun e biro, platin". Quai è la distincziun suprema che questa rait dat. L'edifizi nov satisfa a tut las fasas da las prescripziuns da persistenza rigurusas – dal sboz architectonic sur la realisaziun ecologica e la concepziun d'auta qualitad dal lieu fin a la gestiun effizienta ed al mantegniment cunvegnent. Cun la certificaziun "areal da 2000 watts" cumprova pia il nov center administrativ l'utilisaziun persistenta da las resursas e da las emissiuns durant la construcziun ed en la gestiun dal nov edifizi, sco er da la mobilitad che resulta dal lieu dals biros. Las valurs aspiradas vegnan ademplidas fitg bain cun tut en tut 73 pertschient.

Edifizi innovativ sco norma per l'avegnir
Er per las collavuraturas ed ils collavuraturs stgaffescha la consideraziun cumplessiva da la persistenza avantatgs: il nov lieu administrativ promova ina cultura da lavur communicativa e porscha – cun offertas da car-sharing e da staziuns per chargiar vehichels electrics – ina infrastructura da mobilitad ecologica. Per il chantun sco gestiunari da quest edifizi administrativ èsi impurtant d'administrar el en moda persistenta ed effizienta.


Infurmaziuns:
Markus Dünner, architect chantunal, Uffizi da construcziun auta, tel. +41 81 257 36 31, e-mail Markus.Duenner@hba.gr.ch


Gremi: Uffizi da construcziun auta
Funtauna: rg Uffizi da construcziun auta