Navigaziun principala

Cuntegn da la pagina

Communicaziun da la Regenza dals 12 da november 2020

  • Erste Mitteilung
  • Neuen Beitrag einfügen
La Regenza ha approvà ina cessiun da terren a Domat a la Hamilton Bonaduz SA. Ultra da quai ha ella deliberà ina contribuziun chantunala per in project per promover la diversitad agricula en la Val Stussavgia sco er ina per la renovaziun da la Casa Carigiet.

La Hamilton Bonaduz SA po construir dus edifizis novs a Domat

La Regenza ha approvà il sboz d'in contract da cumpra tranter la vischnanca burgaisa da Domat e la Hamilton Bonaduz SA per metter a disposiziun terren en il parc industrial Vial a Domat. La vischnanca burgaisa da Domat venda a la Hamilton Bonaduz SA il bain immobigliar cun ina surfatscha da 14 087 meters quadrat.
Sin quest bain immobigliar ha la Hamilton Bonaduz SA l'intenziun da construir dus edifizis novs. En in'emprima fasa investescha l'interpresa var 25 milliuns francs per stgaffir ina surfatscha da deposit e da producziun. En quest connex vegnan stgaffidas 200 plazzas da lavur novas. Cun la construcziun dal segund edifizi nov duai vegnir cumenzà l'onn 2022. Cun quel vegnan stgaffidas oravant tut localitads da producziun e da biro che genereschan ulteriuras 500 plazzas da lavur. La summa d'investiziun da quest segund edifizi importa 40 milliuns francs. La valurisaziun che vegn generada directamain ed indirectamain dal project è da gronda impurtanza per l'economia publica dal chantun Grischun.

Visualisierung des neuen Gebäudes der Hamilton Bonaduz AG

© Domenig Architekten AG

La Regenza ha approvà il sboz d'in contract da cumpra tranter la vischnanca burgaisa da Domat e la Hamilton Bonaduz SA per metter a disposiziun terren en il parc industrial Vial a Domat.

Sustegn per il project che rinforza la diversitad agricula en la Val Stussavgia

La vischnanca da Val Stussavgia è pauc populada e caracterisada da l'agricultura. Prioritad en l'agricultura ha actualmain la tegnida d'arments. L'agricultura da la Val Stussavgia duai però sa diversifitgar pli fitg per che famiglias possian lavurar e viver vinavant en la val. Per cuntanscher questa diversificaziun ha la Regenza deliberà ina contribuziun chantunala da maximalmain var 950 000 francs per l'etappa da basa dal PRE Val Stussavgia. Il project promova cun differentas mesiras la producziun, l'elavuraziun e la commerzialisaziun da products agriculs sco er l'engrondiment da la purschida da l'agroturissem e d'ulteriuras purschidas e sustegna uschia la chadaina da valurisaziun regiunala. Quel project consista da passa ventg differents projects parzials che sa basan per part sin structuras existentas e sin purtaders avant maun, ma che cuntegnan per part er novas ideas commerzialas. L'element central da quai è il project parzial "Berghotel Alpenblick Tenna". Tenor il concept da gestiun repassà duai il hotel sa posiziunar cun 100 pertschient products regiunals sin il plat. Ultra da quai è planisà in Alpine FoodLab che duai gidar ad experimentar tant cun materias primas novas, ma er tradiziunalas da la cuntrada muntagnarda ed a metter en il center process da nobilisaziun da la producziun fin sin il plat. Ultra da quai duai vegnir tschentà in impuls sin il stgalim da la producziun cun manar ensemen l'agricultura e la perscrutaziun en spezial tras ils projects parzials. Uschia duain vegnir promovidas e rinforzadas cuminaivlamain innovaziuns per products e per culturas da l'agricultura da muntogna. La diversificaziun agricula è in element essenzial dal punct central da svilup "Meglierar la valurisaziun da l'agricultura en ina cuntrada cultivada intacta" dal program da la Regenza 2021–2024.

Berghotel Alpenblick Tenna von unten

L'agricultura da la Val Stussavgia duai però sa diversifitgar pli fitg per che famiglias possian lavurar e viver vinavant en la val. Per cuntanscher questa diversificaziun ha la Regenza deliberà ina contribuziun chantunala da maximalmain var 950 000 francs per l'etappa da basa dal PRE Val Stussavgia.

Contribuziun chantunala per renovar la Casa Carigiet a Trun

La Regenza ha concedì ina contribuziun chantunala da var 96 500 francs a l'Uniun Trun Cultura per renovar l'imposanta chasa burgaisa Casa Carigiet a Trun. Il project cuntegna ultra da quai in sustegn finanzial da la Confederaziun dal medem import. En connex cun questa contribuziun chantunala vegn la Casa Carigiet messa sut protecziun da monuments chantunala.
La Casa Carigiet (pli baud Casanova) è situada en in lieu prominent a l'entrada vest dal vitg e caracterisescha il maletg dal vitg en moda essenziala. La chasa imposanta è vegnida construida l'onn 1769 dal mistral Jakob Casanova. Il cumenzament dal 20avel tschientaner ha ella survegnì in nov num ed il medem mument ina gronda impurtanza socio-istorica sco chasa, nua ch'èn naschids ils artists da renum naziunal Alois e Zarli Carigiet.
Ils 19 da favrer 2019 ha in incendi desastrus destruì grondas parts dal plaun sut il tetg sco er elements sut quel. Suenter ina midada da possess duai il bain cultural puspè vegnir refatg e silsuenter rendì accessibel al public sco museum.

Casa Carigiet nach dem Brand Casa Carigiet von weitem mit Gerüst

La Regenza ha concedì ina contribuziun chantunala da var 96 500 francs a l'Uniun Trun Cultura per renovar l'imposanta chasa burgaisa Casa Carigiet a Trun.

Neuer Artikel
Gremi: Regenza
Funtauna: rg Chanzlia chantunala dal Grischun