La Regenza ha nominà Hans Peter Risch sco nov secretari dal Departament da giustia, segirezza e sanadad per ils secturs sanadad, militar e protecziun da la populaziun.
Hans Peter Risch ha 54 onns e cumenza la plazza sco secretari da departament il 1. da december 2020. El suonda Nicola Katharina Kull che surpiglia ina nova sfida professiunala.
Hans Peter Risch è creschì si a Haldenstein ed ha studegià giurisprudenza a las universitads da Son Gagl e da Friburg. Suenter ha el lavurà sco collavuratur giuridic e sco manader dal servetsch giuridic tar il Departament da giustia, segirezza e sanadad. Ultra da quai ha el occupà differents uffizis publics, tranter auter è el stà durant ils onns 1995 fin 2001 commember da la suprastanza communala da la vischnanca da Haldenstein, durant ils onns 2001 fin 2007 commember da la CdG e durant ils onns 2009 fin 2016 derschader en uffizi accessoric da la dretgira regiunala (dretgira districtuala) Landquart.
Il secretari da departament sustegna il schef dal Departament da giustia, segirezza e sanadad (DGSS) en tut las dumondas tematicas sco er en la gestiun, en l'organisaziun, en la coordinaziun ed en la controlla dals secturs sanadad, militar e protecziun da la populaziun.
Fotografia agiuntada:
Infurmaziuns:
cusseglier guvernativ Peter Peyer, schef dal Departament da giustia, segirezza e sanadad (DGSS), tel. +41 81 257 25 01, e‑mail Peter.Peyer@djsg.gr.ch
Gremi: Regenza
Funtauna: rg Chanzlia chantunala dal Grischun