La Regenza ha deliberà ina missiva tar ina revisiun parziala da la Lescha davart l'organisaziun giudiziala per mauns dal Cussegl grond. Qua tras duai vegnir stgaffida la pussaivladad da rinforzar temporarmain las dretgiras grischunas tras l'elecziun da derschadras e derschaders extraordinaris. Tras questa revisiun parziala da la Lescha davart l'organisaziun giudiziala n'è la refurma giudiziala betg terminada. Quella vegn persequitada vinavant cun auta prioritad per eliminar ulteriurs puncts debels en il sistem giudizial grischun.
L'elecziun da derschadras e derschaders extraordinaris duai esser pussaivla d'ina vart, sch'ina derschadra u in derschader n'è – durant plirs mais – previsiblamain betg en cas d'exequir ses uffizi pervia d'ina restricziun da la sanadad corporala, spiertala u psichica u per auters motivs. Da l'autra vart duain derschadras e derschaders extraordinaris pudair vegnir elegids, sch'ina dretgira n'è betg pli en cas da liquidar dispitas giuridicas pendentas entaifer in termin adequat u sch'igl è da temair ch'i resultia in tal stadi.
Rinforzament da las dretgiras grischunas en situaziuns excepziunalas
Cun augmentar temporarmain las plazzas da derschadras e derschaders en talas situaziuns excepziunalas duai vegnir procurà che las dretgiras grischunas sajan ablas d'ademplir las funcziuns giudizialas attribuidas ad ellas. L'elecziun da derschadras e derschaders extraordinaris serva pia a garantir che dispitas giuridicas vegnian giuditgadas entaifer in termin adequat. Questa elecziun supplementara è pia necessaria per realisar quest dretg fundamental constituziunal.
Tras la revisiun parziala da la Lescha davart l'organisaziun giudiziala ademplescha la Regenza ina incumbensa legislativa ch'il Cussegl grond l'aveva surdada en la sessiun da zercladur 2019. Las ulteriuras incumbensas legislativas dal Cussegl grond concernent l'organisaziun da las dretgiras chantunalas superiuras duain vegnir realisadas uschè svelt sco pussaivel. Il project respectiv vegn actualmain elavurà cun agid da l'advocat mag. rer. publ. Daniel Kettiger e duai vegnir deliberà durant il segund mez onn 2021 per la consultaziun. Qua tras duain vegnir eliminads ils puncts debels ch'èn sa mussads ils onns passads tar las dretgiras grischunas. Plinavant duain la Dretgira chantunala dal Grischun e la Dretgira administrativa dal Grischun vegnir fusiunadas ad ina suletta dretgira.
Aguinta:
missiva
Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch
Gremi: Regenza
Funtauna: rg Departament da giustia, segirezza e sanadad