La fin d'emna dals 11 fin ils 13 da december vegnan realisads en las regiuns Bernina, Engiadina Bassa/Val Müstair e Malögia ils emprims tests territorials da corona en Svizra. A partir da mesemna en damaun po la populaziun s'annunziar voluntarmain per il test gratuit. Las preparaziuns logisticas per ils tests territorials han cumenzà. Laschar far il test pon tant las abitantas ed ils abitants sco er ils giasts.
Ils tests en il Grischun dal sid duain furnir in maletg da la situaziun mumentana da las persunas asintomaticas e fan part dal concept da protecziun general per il Grischun per dumagnar la pandemia da COVID-19. En il rom dal project da pilot vegn l'entira populaziun en las regiuns Bernina (grond dumber da cas), Engiadina Bassa/Val Müstair e Malögia (regiuns turisticas grondas) testada sin basa voluntara tranter ils 11 ed ils 13 da december 2020. L'acziun da test en il Grischun dal sid è in'emprima emprova per tests periodics e sistematics en il chantun.
En tut la Svizra è il dumber da cas da corona sa diminuì mo pli levamain durant ils ultims dis. En il Grischun s'augmenta il dumber schizunt puspè tenor las cifras la pli novas dal UFSP. Actualmain sa chattan en il chantun Grischun 720 persunas en isolaziun e 1060 persunas en quarantina. Dapi l'october è il dumber da mortoris pli che sa dublegià. Passa la mesadad da las persunas cun in test positiv na sa betg, nua ch'ella è s'infectada. Senza ulteriuras mesiras exista oravant tut il privel ch'ils ospitals arrivian a lur cunfins durant la stagiun d'enviern.
In signal per gruppas da persunas spezialmain periclitadas
Cun il concept da protecziun general per il Grischun vul la Regenza dar in signal ensemen cun la populaziun: per franar la pandemia, per la sanadad da la populaziun e per la protecziun da las gruppas da persunas spezialmain periclitadas, per damain mortoris, per garantir per gronda part la stagiun d'enviern e per pussibilitar da festivar Nadal en il ravugl da la famiglia.
Las 23 staziuns da test en 18 vischnancas e lur uras d'avertura èn publitgadas sin la pagina d'internet www.gr.ch/corona-test. Sin la pagina d'internet po la populaziun er s'annunziar a partir da mesemna per il test. Uschia vegn garantì in andament senza difficultads – resguardond las mesiras da protecziun. La populaziun pertutgada vegn infurmada supplementarmain a maun d'in flyer che vegn tramess en tut las chasadas. Ina vasta campagna da communicaziun duai sensibilisar la populaziun per ils tests sco er regurdar ella d'observar las reglas vertentas da distanza e d'igiena.
En cas da dumondas davart l'annunzia per ils tests pon ins sa drizzar a la hotline chantunala "Post da communicaziun per il coronavirus". Quella è occupada ad interim durant in temp prolungà da mesemna fin dumengia, da las 8.00 fin las 18.00.
Agiuntas:
- factsheet
- flyer
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Gremi: Regenza
Funtauna: rg Regenza