Navigaziun principala

Cuntegn da la pagina

Finì cun la chatscha speziala 2020

  • Erste Mitteilung
  • Neuen Beitrag einfügen

La chatscha speziala 2020 en il chantun Grischun sto vegnir rutta giu pli baud che planisà. En tschertas regiuns hai uschè blera naiv, uschia che la cuntinuaziun da la chatscha speziala n'è betg pli pussaivla tant per motivs da la biologia da selvaschina sco er en vista a la segirezza da las chatschadras e dals chatschaders. Pervia da las mesiras da COVID-19 pli rigurusas dal Cussegl federal stoi er vegnir desistì da manar tras la chatscha speziala en regiuns pli bassas.

En bleras regiuns dal Grischun hai dà uschè blera naiv las ultimas emnas, ch'ils animals selvadis èn fitg restrenschids en lur moviments. Ina chatscha intensiva sin tschiervs e sin chavriels fiss ina ferma intervenziun en la bilantscha d'energia dals animals. Quai duai vegnir impedì sche pussaivel. Pervia da quai na vegni betg cuntinuà cun la chatscha speziala en questas regiuns. Ultra da quai ha il Cussegl federal decidì il venderdi passà da scumandar occurrenzas publicas a partir dals 12 da december 2020. Tenor la secziun speziala cumpetenta da l'Uffizi federal d'ambient e da la Conferenza da las administraturas e dals administraturs da chatscha e da pestga èn las chatschas en societads, las chatschas en uniuns sco er las chatschas spezialas che vegnan organisadas dals posts da servetsch chantunals "occurrenzas publicas". Correspundentamain ston quellas vegnir interruttas.

Quasi cuntanschì las cifras da prelevaziun
Malgrà las nauschas cundiziuns da l'aura durant la chatscha il november ed il december han las chatschadras ed ils chatschaders dal Grischun er quest onn gidà decisivamain a cuntanscher uschè bain sco pussaivel las cifras da prelevaziun en mira. I èn vegnids sajettads var 5500 tschiervs, quai che correspunda al plan da prelevaziun da 5560 tschiervs. La finamira da cuntanscher ina relaziun tranter las schlattainas d'almain 50 pertschient animals feminins è dentant vegnida manchentada. Las cifras exactas vegnan ad esser enconuschentas pir pli tard.

Singuls animals vegnan sajettads da la surveglianza da chatscha
En las regiuns cun ils conflicts ils pli gronds tranter il guaud e la selvaschina vegn la surveglianza da chatscha sche pussaivel a sajettar anc singuls animals. Cun questa mesira vegni empruvà da limitar las ruissas da selvaschina en ils guauds da protecziun spezialmain periclitads e da curreger fin ad in tschert grad la relaziun tranter las schlattainas menziunada. Questas intervenziuns pertutgan cunzunt il Partenz, il Signuradi, la Val dal Rain da Cuira, la Tumleastga e tscherts territoris da la Surselva.


Infurmaziuns:
dr. Adrian Arquint, manader da l'Uffizi da chatscha e pestga dal Grischun, tel. +41 81 257 38 92, e-mail Adrian.Arquint@ajf.gr.ch


Gremi: Uffizi da chatscha e pestga
Funtauna: rg Uffizi da chatscha e pestga

Neuer Artikel