Navigaziun principala

Cuntegn da la pagina

La Regenza metta a disposiziun agids per cas da direzza ad interpresas pertutgadas da corona

  • Erste Mitteilung
  • Neuen Beitrag einfügen

Il chantun metta a disposiziun novs agids per cas da direzza ad interpresas spezialmain pertutgadas. La basa furman las mesiras per cas da direzza che la Confederaziun ha deliberà dacurt. La Regenza ha relaschà l'ordinaziun executiva necessaria, uschia che las interpresas pertutgadas pon bainbaud inoltrar dumondas. Tut en tut stattan a disposiziun 22 milliuns francs, da quels surpiglia il chantun circa 7 milliuns e la Confederaziun 15 milliuns.

Il Parlament federal ed il Cussegl federal han decretà las ultimas emnas ed ils ultims dis las regulaziuns ed ils detagls per il nov program da la Confederaziun e dals chantuns per cas da direzza a favur d'interpresas pertutgadas. A chaschun da sia sesida dals 15 da december 2020 ha la Regenza concludì l'ordinaziun executiva chantunala necessaria che entra en vigur il 1. da schaner 2021. Cun quella pon vegnir realisadas las mesiras per cas da direzza en il chantun.

22 milliuns francs agids per cas da direzza per interpresas pertutgadas
Tut en tut stattan a disposiziun var 22 milliuns francs per sustegnair interpresas spezialmain pertutgadas che han lur sedia en il chantun Grischun, particularmain en la branscha d'events, commerziants da fiera, furniturs da servetschs da la branscha da viadi, manaschis da gastronomia e d'hotellaria sco er manaschis turistics.

D'in cas da direzza sa tracti, sch'ina interpresa ha l'onn 2020 ina perdita da la svieuta da passa 40 pertschient cumpareglià cun ils dus onns precedents. Il sustegn ha lieu en furma da contribuziuns betg restituiblas. El è limità a maximalmain 500 000 francs per interpresa u a 10 pertschient da la svieuta en media dals onns precedents. Nagin sustegn na survegnan las interpresas che han il dretg sin auters agids finanzials da COVID-19 da la Confederaziun en ils secturs cultura, sport, traffic public u medias.

Bainbaud pussaivel d'inoltrar dumondas per agids per cas da direzza
Il Departament d'economia publica e fatgs socials (DES) lavura cun tutta forza vi da la realisaziun e vi da l'execuziun da las novas mesiras per cas da direzza. Il pli tard a partir dals 4 da schaner 2021, eventualmain gia a partir dals 28 da december 2020, pon vegnir inoltradas dumondas. Las infurmaziuns ed il formular da dumonda stattan a disposiziun sin la pagina d'internet dal DES.

Igl è fitg impurtant che las interpresas inoltreschian tut ils documents necessaris e fetschian tut las indicaziuns necessarias en il rom da la dumonda. Il dretg federal prescriva numerus criteris. Pervia da quai vegn la dumonda ad esser relativamain voluminusa. Sche las dumondas han la qualitad necessaria, pon vegnir prendidas relativamain svelt decisiuns. Schebain las contribuziuns pon vegnir pajadas svelt, dependa da la cumplettadad da las dumondas.

Dumondas pon vegnir inoltradas fin ils 30 d'avrigl 2021.

La Confederaziun sto anc examinar l'ordinaziun relaschada da la Regenza ed alura confermar, ch'ella mettia a disposiziun sia part als meds finanzials per il chantun Grischun.

Resalvadas èn adattaziuns als svilups ils pli novs
Ils 11 da december 2020 ha il Cussegl federal communitgà ch'el vuless augmentar ils daners per las mesiras per cas da direzza ed extender las pussaivladads per sustegnair interpresas. Previsiblamain vegn la Confederaziun a deliberar questas novaziuns ils 18 da december 2020. Pervia da quests svilups vegni eventualmain ad esser necessari da far adattaziuns. Cur ch'igl è uschè lunsch, vegni infurmà davart las midadas.


Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch


Gremi: Regenza
Funtauna: rg Chanzlia chantunala

Neuer Artikel