Navigaziun principala

Cuntegn da la pagina

Actualmain èsi pussaivel da tegnair avert ils territoris da skis grischuns

  • Erste Mitteilung
  • Neuen Beitrag einfügen

Ils territoris da skis restan averts durant ils firads, sche la situaziun epidemiologica e sche las capacitads dals ospitals na sa midan betg decisivamain. La situaziun vegn giuditgada di per di. Quai ha la Regenza concludì glindesdi sin basa da la situaziun actuala en il Grischun. Senza midadas essenzialas da la situaziun vegn la Regenza a decider danovamain ils 29 da december 2020. Ultra da quai sa prepara il chantun intensivamain per pudair cumenzar ils 4 da schaner cun las emprimas vaccinaziuns.

Il svilup dal dumber da cas en il Grischun è stabil, la media dals cas positivs novs sa chatta tar var 100 persunas per di. Actualmain (stadi: 21 da december 2020) sa chattan 845 persunas en isolaziun e 958 persunas en quarantina. Ils ospitals regiunals disponan actualmain d'avunda capacitads per tractar tant las persunas infectadas cun COVID‑19 sco er autras persunas, en spezial talas cun blessuras da sport. Las staziuns intensivas èn actualmain occupadas en moda normala e n'èn betg surchargiadas.

Territoris da skis averts cun limitaziun da persunas
Uschia permetta la situaziun epidemiologica en il chantun da tegnair avert ils territoris da skis. Cunquai ch'er las premissas tenor l'art. 5c al. 3 lit. b fin d da l'Ordinaziun davart COVID-19 situaziun speziala èn ademplidas, pon ils territoris da skis en il chantun vegnir averts, premess che l'Uffizi da sanadad haja approvà il concept da protecziun respectiv. Ils territoris da skis grischuns èn conscients da lur responsabladad en la situaziun actuala. Els èn pronts d'acceptar restricziuns substanzialas dal dumber maximal da persunas en il territori da skis. Per cuntanscher quai vegn limitada la vendita da cartas dal di. A giasts dal di vegni recumandà urgentamain da cumprar, sche adina pussaivel, ordavant in bigliet online.

Il svilup dals dumbers da cas po però sa midar cuntinuadamain. Pervia da quai sto la situaziun vegnir giuditgada di per di. Correspundentamain po la permissiun vegnir concedida per il mument fin ils 3 da schaner 2021, sche la situaziun na sa mida betg essenzialmain. Senza midadas essenzialas da la situaziun vegn la Regenza a decider danovamain ils 29 da december 2020.

Nagin alcohol sin la pista 
Per che las capacitads en ils ospitals, en spezial en las staziuns da tgira intensiva, na sajan betg exauridas memia svelt, ston ils territoris da skis prender vastas mesiras per reducir ristgas d'accident (sco p.ex. segirar lieus privlus, serrar pistas privlusas e.u.v.). Plinavant duain ils manaschis intimar ils giasts d'evitar ristgas uschenavant sco pussaivel. Sco ulteriura mesira per impedir ch'ils ospitals vegnian surchargiads èsi – sin basa da l'art. 40 al. 1 da la Lescha federala davart il cumbat cunter malsognas transmissiblas da l'uman (Lescha d'epidemias, LEp; CS 818.101) – scumandà da vender e da consumar alcohol en ils territoris da skis.

Vaccinaziun a partir dal cumenzament da schaner
Il chantun Grischun sa prepara intensivamain per pudair cumenzar cun las emprimas vaccinaziuns a partir dals 4 da schaner 2021, premess ch'il vaccin vegnia furnì e che la logistica saja garantida. En il center stat per l'Uffizi da sanadad la segirezza e la confidenza da la populaziun. Pervia da quai na vegn il chantun betg a sa participar vi d'ina concurrenza tranter ils chantuns. Schebain che l'emprim vaccin è admess, existan actualmain anc differentas sfidas. Uschia mancan anc la recumandaziun concreta da vaccinar da la Confederaziun u la garanzia da la logistica e la disponibladad dal program da computer administrativ da la Confederaziun. 

Per il Grischun poi previsiblamain vegnir fatg quint cun ina pitschna quantitad da vaccin. Fin l'emna chalendara 3 stattan pervia da quai a disposiziun circa 9000 dosas da vaccin. Quai correspunda ad in'attribuziun da vaccins per var 4500 persunas, perquai ch'i vegn recumandà in schema da 2 dosas resp. ina repetiziun suenter 21 dis. En il center stattan pervia da quai las persunas periclitadas spezialmain (senza dunnas en speranza, l'emprim persunas sur 65 onns, suenter persunas sut 65 onns cun comorbiditads) ed alura il persunal da sanadad che ha contact cun pazientas e pazients ed il persunal da tgira da persunas spezialmain periclitadas.


Infurmaziuns: 
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)


Gremi: Regenza
Funtauna: rg Departament da giustia, segirezza e sanadad

Neuer Artikel