Navigation

Inhaltsbereich

  • Erste Mitteilung
  • Neuen Beitrag einfügen

Il Cussegl federal ha l'intenziun da prolungar fin la fin da favrer la serrada da restaurants sco er da stabiliments da cultura, da sport e da temp liber. La decisiun annunziada per ils 13 da schaner 2021 tutga cun tutta vehemenza il chantun turistic Grischun. Pervia da quai dovri svelt ulteriuras prestaziuns finanzialas da sustegn da la Confederaziun. Il chantun Grischun ha supplitgà gia pliras giadas il Cussegl federal da concluder ulteriuras mesiras per mitigiar las consequenzas economicas dals manaschis pertutgads.

Las mesiras annunziadas dal Cussegl federal èn nauschas novas per il chantun Grischun. Ils manaschis da gastronomia (hotels e restaurants, er en territoris da skis) sco er las gestiunarias ed ils gestiunaris da stabiliments da cultura, da sport e da temp liber èn pertutgads spezialmain ferm da questa decisiun. Als manaschis pertutgads sto vegnir purschida svelt ina perspectiva.

Il Grischun pretenda ulteriurs agids finanzials da la Confederaziun
La prolungaziun da las mesiras federalas croda amez la stagiun d'enviern – la stagiun relevanta per l'economia publica. La chargia principala per dumagnar la pandemia dal coronavirus vegn purtada dal sectur da turissem. La creaziun da valurs va a perder oravant tut en ils secturs ch'èn vegnids serrads uffizialmain, sco la gastronomia, la branscha da temp liber e da cultura e branschas parentadas. Uschia èsi cler che las economias publicas che dependan dal turissem d'enviern èn pertutgadas spezialmain ferm da la decisiun. Perquai ha il chantun supplitgà gia pliras giadas il Cussegl federal da metter a disposiziun svelt agids supplementars per ils chantuns spezialmain pertutgads respectivamain per las branschas spezialmain pertutgadas sco per exempel il turissem d'enviern.

Tras il preavis dal Cussegl federal da mesemna, ils 6 da schaner 2021, è la supplica dal chantun daventada anc pli urgenta. Las interpresas e branschas pertutgadas dovran urgentamain ina perspectiva per il futur. Perquai èsi da beneventar ch'il Cussegl federal vegn a decider – sco pretendì dal chantun Grischun – gia a chaschun da sia sesida dals 13 da schaner 2021, e betg pir ils 20 da schaner 2021, davart mesiras d'agid per l'entira Svizra.

I dovra agids coordinads tranter la Confederaziun ed ils chantuns
Cumplementarmain a las mesiras federalas è il chantun pront da metter a disposiziun ulteriurs agids da sustegn chantunals. Uschia ha la Regenza relaschà gia il december 2020 l'Ordinaziun executiva chantunala davart mesiras per interpresas en cas da direzza en connex cun l'epidemia da COVID‑19 e mess en vigur quella per il 1. da schaner 2021. La dumonda per il credit brut necessari da 39 milliuns francs ha ella suttamess a la Cumissiun da gestiun dal Cussegl grond. Eventualas ulteriuras adattaziuns e cumplettaziuns necessarias vegnan prendidas per mauns immediatamain. Vegnir prendidas en mira ston er vinavant primarmain soluziuns sin plaun naziunal che vegnan cofinanziadas da la Confederaziun. Soluziuns chantunalas individualas respectivamain proceduras betg coordinads cun la Confederaziun n'èn betg cunvegnentas e ston vegnir refusadas. Las experientschas fatgas durant l'emprima unda da la primavaira passada han mussà quai cleramain. Las mesiras chantunalas e federalas ston ir maun en maun – las chargias finanzialas ston vegnir repartidas en moda gista.

Il chantun sustegna l'economia grischuna tenor sias forzas
Dapi l'erupziun da la pandemia dal coronavirus s'inscuntra la Regenza regularmain cun ils caders da l'economia grischuna en il rom d'ina maisa radunda. L'onn passà ha il chantun Grischun sustegnì generusamain l'economia, il turissem, il sport, la cultura, il traffic sco er las instituziuns da sanadad e da tgira cun contribuziuns finanzialas. Nua che quai è necessari, vegn el a far quai er durant l'onn nov. Pervia dal coronavirus dastgass il quint annual 2020 vegnir engrevgià cun expensas supplementaras da 65 milliuns francs. Las consequenzas finanzialas da la pandemia dal coronavirus vegnan a sa mussar er en il quint annual 2021. Actualmain vegnan las grevezzas supplementaras per l'onn da gestiun 2021 stimadas a var 90 milliuns francs. Da quai èn circa 50 milliuns francs perditas da taglia da l'onn fiscal 2020.


Infurmaziuns
Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch
Cusseglier guvernativ Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch

Las persunas da contact stattan a disposiziun tranter las 15.45 e las 16.30.


Gremi: Regenza
Funtauna: rg Chanzlia chantunala dal Grischun

Neuer Artikel