Navigaziun principala

Cuntegn da la pagina

Tests da massa a San Murezzan per la segirezza da la populaziun e dals giasts

  • Erste Mitteilung
  • Neuen Beitrag einfügen

La populaziun ed ils giasts da la vischnanca da San Murezzan èn supplitgads urgentamain da sa laschar testar sin il coronavirus mardi, ils 19 da schaner 2021. L'acziun da test è gratuita e vegn fatga sin ordinaziun da l'Uffizi da sanadad dal Grischun. Testà vegni da las 8.00 fin las 18.00 als dus lieus halla da gimnastica e halla da baiver. L'annunzia online è ussa averta.

L'Uffizi da sanadad dal Grischun ha ordinà il test da massa, suenter ch'igl è vegnì constatà en dus hotels a San Murezzan ina derasaziun pli gronda dal coronavirus mutà. L'Uffizi da sanadad ha perquai mess sut quarantina ils dus hotels ed ha fatg il glindesdi tests da massa en ils dus manaschis pertutgads. Ultra da quai èn vegnidas serradas ad interim las scolas, ils centers da di sco er las scolas da skis a San Murezzan. L'obligaziun da purtar ina mascrina vala da nov sin tut il territori communal. Tut en tut èn vegnidas registradas duas dunsainas da cas en ils dus hotels. 

Il test dal coronavirus è pussaivel per uffants, che ston esser accumpagnads dals geniturs, a partir dal 5. fin il 12. onn da vegliadetgna cun in test da spida. Sche uffants e giuvenils sut 18 onns vegnan sulets al test, ston els avair ina decleraziun da consentiment dals geniturs.

Il test da massa a San Murezzan è gratuit per las abitantas ed ils abitants sco er per ils giasts e pussibilitescha da chattar persunas che portan il virus en sai. Uschia sa laschan prender sistematicamain las mesiras per franar vinavant la pandemia.

Obligaziun da purtar ina mascrina a San Murezzan
Activitads d'uniun e trenaments da sport cun giuvenils na duain betg avair lieu per il mument. Plinavant vala a partir d'immediat l'obligaziun da purtar ina mascrina sin tut il territori communal da San Murezzan. L'Uffizi da sanadad è preoccupà: il virus mutà è bler pli contagius che la varianta derasada fin ussa sin l'entir mund. L'Uffizi da sanadad recumonda urgentamain a las abitantas ed als abitants sco er als giasts da desister da tut ils contacts betg necessaris cun autras persunas e d'observar consequentamain las reglas da distanza e d'igiena vertentas.

Annunzia online vegn recumandada
Schebain ch'ins po er s'annunziar al lieu, vegni recumandà da s'annunziar online per evitar temps da spetga pli lungs.

- Annunzia per tudestg
- Annunzia per talian
- Annunzia per rumantsch


Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)


Funtauna: Uffizi da sanadad
 

Neuer Artikel