Glindesdi, ils 25 da schaner 2021, vegnan ad entrar en funcziun ils emprims centers regiunals da vaccinaziun e da test. Pervia da la disponibladad limitada dal vaccin èsi vinavant necessari da priorisar las gruppas en mira. Per entant vegnan vaccinadas persunas sur 75 onns sco er persunas creschidas cun grevas malsognas cronicas. Ils centers da vaccinaziun e da test èn previs per dus intents (vaccinar e testar).
Ils emprims dals 9 centers regiunals da vaccinaziun e da test vegnan a vaccinar a partir da glindesdi, ils 25 da schaner 2021. Ils centers che sa basan da princip sin l'infrastructura dals ospitals, permettan da testar persunas sintomaticas sco er persunas asintomaticas ed èn previs – danor l'ospital da l'Engiadin'Ota a Samedan – er per dus intents (vaccinar e testar). En il sectur da l'administraziun vegnan ils centers da vaccinaziun e da test sustegnids da la protecziun civila.
9 centers regiunals da vaccinaziun e da test
Tut tenor la disponibladad dal vaccin vegnan vaccinadas las gruppas en mira priorisadas, suenter ch'ellas èn vegnidas registradas, a partir dals 25 da schaner 2021, en ils ospitals regiunals da Tavau, da Glion, da Puschlav, da Schiers, da Scuol e da Tusaun sco er en ils centers a Cama, a Cuira (Ospital da la Crusch) ed a San Murezzan. Ils termins da vaccinaziun da las persunas annunziadas vegnan attribuids e confermads dals centers da vaccinaziun suenter la registraziun; i n'è betg pussaivel da tscherner libramain in termin. Las gruppas en mira vegnan priorisadas tenor il plan da vaccinaziun e tenor las prescripziuns da l'Uffizi federal da sanadad publica (UFSP). Il mument datti cleramain dapli annunzias che vaccins. Pervia da la disponibladad limitada dal vaccin vegnan ils termins per la vaccinaziun assegnads cuntinuadamain entaifer las gruppas en mira. Per s'annunziar ordavant online dovran ins la carta da l'assicuranza da malsauns ed in numer da telefon.
Las cussegliaziuns da vaccinaziun tutgan al champ da cumpetenza da las medias e dals medis da chasa. Ellas ed els vegnan a pudair porscher pli tard er vaccinaziuns en lur praticas, sch'il vaccin è disponibel.
Vinavant èn en acziun duas equipas mobilas da vaccinaziun, che vaccineschan actualmain abitantas ed abitants en chasas da persunas attempadas e da tgira en l'entir chantun. Fin ussa (stadi dals 21 da schaner 2021, a las 17.00) èn vegnidas vaccinadas 4035 persunas; quai èn 50 da 52 chasas da persunas attempadas e da tgira.
Ulteriuras infurmaziuns davart la vaccinaziun cunter il coronavirus vegnan publitgadas d'in cuntin sin la pagina d'internet www.gr.ch/impfung.
Testar activamain ha effects mesirabels
DL'Uffizi da sanadad appellescha la populaziun da sa laschar testar en ils centers regiunals, er sch'i sa mussan mo levs sintoms. Sin basa da las analisas vertentas da l'entir chantun e da l'erupziun ha il testar activamain – er persunas asintomaticas – in effect cleramain mesirabel ed è in med adattà per interrumper las chadainas da transmissiun dal coronavirus.
Vinavant vegni recumandà da renunziar a contacts betg necessaris cun autras persunas e d'observar consequentamain las reglas vertents da distanza e d'igiena.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Infurmaziun per collavuraturas e collavuraturs da las medias:
Pervia da las mesiras vertentas cunter il coronavirus n'èsi betg pussaivel d'organisar in inscunter da las medias a chaschun da l'entrada en funcziun dals centers da vaccinaziun e da test. Per mantegnair la sfera privata ed ils dretgs persunals da las persunas vaccinadas As supplitgain nus da desister da visitas e d'intervistas betg avisadas en ils centers da vaccinaziun e da test. Per coordinar termins e per chattar persunas che dattan infurmaziuns As drizzai per plaschair al Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Funtauna: Uffizi da sanadad