La Cumissiun per economia e taxas (CET) dal Cussegl grond ha predeliberà ulteriuras ordinaziuns d'urgenza davart la pandemia da COVID-19. Ultra da quai è ella s'exprimida davart ils tests en ils manaschis.
Sut il presidi da la presidenta da la cumissiun Carmelia Maissen ha la CET predeliberà en ina sesida d'in mez di duas novas ordinaziuns d'urgenza COVID-19 da la Regenza. A la sesida è er sa participà il cusseglier guvernativ Marcus Caduff.
Ordinaziun chantunala davart products frestgs da manaschis da gastronomia ed execuziun da las regulaziuns per cas da direzza da la Confederaziun
La revisiun parziala da l'Ordinaziun chantunala COVID-19 cas da direzza è vegnida tractada. Il motiv per quai èn stadas las mesiras ordinadas a curta vista ils 2 da december 2020, tranter auter cun serrar ils manaschis da gastronomia. En l'ordinaziun vegni ussa garantì ch'ils manaschis da gastronomia pertutgads survegnan indemnisaziuns per ils products frestgs gia cumprads che van a mal. Ultra da quai è vegnida discutada l'Ordinaziun executiva chantunala davart mesiras per interpresas en cas da direzza che realisescha las mesiras federalas per interpresas en il chantun Grischun. La cumissiun è sa laschada infurmar detagliadamain da la Regenza davart las differentas mesiras ed ha laschà respunder dumondas davart la situaziun actuala da las interpresas grischunas. Ella recumonda unanimamain al Cussegl grond d'approvar las duas ordinaziuns.
Il Cussegl grond vegn a tractar ils projects en la sessiun da favrer 2021.
Sustegn finanzial pli grond per tests en manaschis
La cumissiun ha er beneventà la strategia da la Regenza da far tests en manaschis en tut il chantun. La CET resguarda questa mesira sco ina contribuziun impurtanta, efficazia e raschunaivla per cumbatter cunter la pandemia. Ma ella renda er attent al fatg che tals tests en manaschis èn colliads cun gronds custs finanzials per numerusas interpresas. Ils tests per la populaziun percunter èn gratuits. Pervia da quai giavischa la CET da la Regenza in sustegn pli grond en connex cun la surpigliada dals custs per ils tests da COVID-19 che vegnan fatgs en ils manaschis.
Infurmaziuns:
presidenta da la cumissiun Carmelia Maissen, tel. +41 79 713 90 27
Gremi: Cumissiun per economia e taxas
Funtauna: rg Cumissiun per economia e taxas